Penodi hyfforddwr newydd tîm saith bob ochr Cymru

Daeth cadarnhad mai Gareth Williams yw hyfforddwr newydd tîm saith bob ochr Cymru.

Mae’n disodli Paul John, sydd wedi derbyn swydd gyda thîm hyfforddi rhanbarth y Gleision.

Bu Williams yn hyfforddwr dros dro ers i John gyhoeddi ei ymadawiad fis Rhagfyr diwethaf.

Mae rhaglen ddatblygu’r tîm saith bob ochr yn debygol o gael ei adolygu yn ystod y misoedd nesaf.

Roedd Gareth Williams yn aelod cyson o dîm saith bob ochr Cymru yn ystod ei yrfa, cyn troi at hyfforddi chwe blynedd yn ôl.

Yn dilyn y cyhoeddiad, dywedodd mewn datganiad: “Mae cael y swydd yn barhaol wedi bod yn uchelgais gen i ac rwy’n ddiolchgar i Undeb Rygbi Cymru am fy nghefnogi i yn hynny o beth nawr.

“Mae’n fraint cael y cyfle i symud y rhaglen saith bob ochr yn ei blaen yn ystod dwy rownd olaf y tymor, cyn edrych ymlaen at Gyfres y Byd yr IRB y tymor nesaf.”