Dreigiau Casnewydd Gwent 8–24 Connacht
Colli gartref fu hanes y Dreigiau yn y RaboDirect Pro12 brynhawn Sul wrth i Connacht ymweld â Rodney Parade.
Roedd pac y Gwyddelod yn llawer cryfach na’r tîm cartref a deilliodd eu pedwar cais o sgarmesau symudol.
Y Dreigiau a gafodd y pwyntiau cyntaf gyda chic gosb Jason Tovey wedi dim ond dau funud ond aeth Connacht ar y blaen pan diriodd John Muldoon gais cyntaf y gêm.
Dilynodd ail gais i Rodney Ah You yn fuan wedyn ac roedd y Gwyddelod ar y blaen o 14-3 yn dilyn dau drosiad Dan Parks.
Felly yr arhosodd hi tan hanner amser ond roedd y Dreigiau dipyn gwell yn yr ail hanner. Y Cymry a gafodd y mwyafrif o’r tir a’r meddiant ond wnaeth hynny ddim troi’n bwyntiau.
Connacht yn hytrach a gafodd y pwyntiau nesaf wrth i Muldoon dorri o gefn sgarmes symudol arall i sgorio ei ail gais ef a thrydydd ei dîm.
Tarodd Tom Prydie yn ôl gyda chais i’r Dreigiau ond rhy ychydig rhy hwyr oedd hi a sicrhaodd Connacht y pwynt bonws pan groesodd Michael Swift am bedwerydd cais yn symudiad olaf y gêm.
Mae’r canlyniad yn cadw’r Dreigiau yn nawfed yn nhabl y Pro12. Mae Connacht ar y llaw arall yn codi i’r seithfed safle.
.
Dreigiau
Cais: Tom Prydie 69’
Cic Gosb: Jason Tovey 2’
Cerdyn Melyn: Robert Sidoli 22’
.
Connacht
Ceisiau: John Muldoon 17’, 67’, Rodney Ah You 23’, Michael Swift 79’
Trosiadau: Dan Parks 18’, 24’
Cerdyn Melyn: Darragh Leader 68’
