Gleision Caerdydd 22–34 Leinster
Cafwyd digon o gyffro a cheisiau ar Barc yr Arfau nos Iau ond ofer fu ymdrechion y Gleision i drechu Leinster yn y RaboDirect Pro12.
Cafodd y cefnogwyr cartref dri chais i’w ddathlu ond nid oedd hynny’n ddigon wrth i’r ymwelwyr sicrhau buddugoliaeth a phwynt bonws gyda phedwar.
Hanner Cyntaf
Dechreuodd y Gwyddelod yn gryf ac roeddynt saith pwynt ar y blaen wedi dim ond pum munud diolch i gais yr wythwr, Jack Conan, a throsiad Jimmy Gopperth.
Ac roedd yr ymwelwyr ym mhellach ar y blaen erbyn hanner ffordd trwy’r hanner cyntaf wedi i’r bachwr, Richardt Strauss, groesi am yr ail gais cyn i Gopperth ychwanegu’r trosiad.
Roedd perygl iddi droi’n grasfa fel honno a gafodd y Gleision ar yr RDS bythefnos yn ôl felly, ond dangosodd y tîm cartref gymeriad cryf i frwydro nôl cyn hanner amser.
Creodd y maswr, Gareth Davies, gais unigol da iddo’i hun gyda bylchiad deheuig i ddechrau cyn ychwanegu’r trosiad.
Yna, bum munud cyn yr egwyl fe diriodd y bachwr, Kristian Dacey, yn dilyn hyrddiad da dros y llinell gais gan y blaenwyr.
Roedd Gopperth wedi ychwanegu cic gosb erbyn hynny ond roedd y Gleision yn ôl o fewn pum pwynt, 12-17 wedi deugain munud.
Ail Hanner
Cyfnewidiodd Davies a Gopperth gic gosb yr un ym munudau agoriadol yr ail gyfnod cyn i’r Gwyddelod fynd â’r gêm o afael y Gleision eto gyda dau gais cyflym.
Croesodd y prop, Michael Bent, a’r mewnwr, Eoin Reddan, am ddau gais o fewn pedwar munud i’w gilydd toc cyn yr awr, a rhoddodd y rheiny ynghyd â dau drosiad Gopperth yr ymwelwyr 19 pwynt ar y blaen gyda chwarter y gêm ar ôl.
Fe wnaeth cais y cefnwr, Dan Fish, roi gobaith i’r Gleision ond ofer a fu eu hymdrechion yn y munudau olaf i achub pwynt bonws neu ddau.
Mae’r canlyniad yn codi Leinster i frig tabl y Pro12 tra mae’r Gleision yn aros yn nawfed.
.
Gleision
Ceisiau: Gareth Davies 21’, Kristian Dacey 35’, Dan Fish 61’
Trosiadau: Gareth Davies 22’, 62’
Cic Gosb: Gareth Davies 45’
.
Leinster
Ceisiau: Jack Conan 4’, Richardt Strauss 18’, Michael Bent 52’, Eoin Reddan 56’
Trosiadau: Jimmy Gopperth 5’, 19’, 53’, 57’
Ciciau Cosb: Jimmy Gopperth 28’, 47’
Cerdyn Melyn: Tom Denton 35’
