Cymru 17–7 Tonga
Roedd y gêm rhwng Cymru a Tonga yn Stadiwm y Mileniwm nos Wener mor ddi fflach â chrys llwyd newydd Cymru.
Daeth unig gyffro’r gêm yn yr hanner cyntaf pan sgoriodd y ddau ganolwr, Owain Williams ac Ashley Beck, geisiau da i Gymru. Roedd yr ail hanner yn ddi gyffro ac yn gwbl ddi sgôr ond roedd y tîm cartref wedi gwneud digon i sicrhau buddugoliaeth cyn yr egwyl.
Hanner Cyntaf
Ciciodd Leigh Halfpenny’r pwyntiau cyntaf yn dilyn chwarter awr cyntaf di sgôr, a buan iawn wedyn y daeth y cais agoriadol i Williams.
Rhedodd canolwr ifanc y Gleision yr holl ffordd o’r llinell hanner yn dilyn gwaith da James Hook a Halfpenny’n gynharach yn y symudiad. 10-0 yn dilyn trosiad Halfpenny.
Cafwyd ail gais chwarter awr cyn yr egwyl ac roedd hwnnw’n un da iawn hefyd. Enillodd George North dir da cyn i Beck orffen y symudiad yn daclus yn y gornel. Llwyddodd Halfpenny gyda’r trosiad eto i ymestyn mantais Cymru i 17 pwynt.
Ond roedd Tonga’n ôl ynddi erbyn hanner amser diolch i gais Will Helu a throsiad Latuime Fosita. Rhedodd yr asgellwr, Helu, ar ongl dda i dderbyn dadlwythiad y blaenasgellwr, Viliami Ma’afu, cyn croesi o dan y pyst. 17-7 ar yr egwyl.
Ail Hanner
Cafwyd llawer gormod o oedi yn yr ail hanner gyda’r sgrymiau a’r eilyddio cyson yn mygu unrhyw batrwm rhag datblygu.
Serch hynny, roedd y ddau asgellwr, Hallam Amos a North, yn meddwl eu bod wedi sgorio ceisiau ond cafodd y ddau eu hatal gan benderfyniadau cywir y dyfarnwr fideo, Carlo Demasco.
Daeth ‘seren y gêm’, Luke Charteris yn agos at dirio hefyd ond collodd y clo ei afael ar y bêl ar yr eiliad dyngedfennol.
Buddugoliaeth felly i ail dîm Cymru fwy neu lai ond bydd rhaid iddynt fod yn dipyn gwell os am drechu Awstralia yn y gêm olaf yr wythnos nesaf.
.
Cymru
Ceisiau: Owen Williams 16’, Ashley Beck 25’,
Trosiadau: Leigh Halfpenny 17’, 26’
Cic Gosb: Leigh Halfpenny 14’
.
Tonga
Cais: Will Helu 34’
Trosiad: Latiume Fosita 35’
