Dreigiau Casnewydd Gwent 23–16 Scarlets

Cafwyd gêm dda iawn yn y RaboDirect Pro12 rhwng y Dreigiau a’r Scarlets ar Rodney Parade nos Wener.

Cafodd y ddau ranbarth gyfnodau da ond y Dreigiau aeth â hi yn y diwedd diolch i geisiau hanner cyntaf Phil Price a Dan Evans.

Hanner Cyntaf

Y Dreigiau oedd y tîm gorau o dipyn yn chwarter cyntaf y gêm a doedd fawr o syndod eu gweld yn sefydlu mantais iach wedi ugain munud. Agorodd Tom Prydie y sgorio gyda chic gosb gynnar cyn i’r tîm cartref ychwanegu dau gais hefyd.

Phil Price a sgoriodd y cyntaf yn y gornel yn dilyn dadlwythiad gwych ei gyd brop, Francisco Chaparro. Yna, ychwanegodd y cefnwr, Dan Evans, yr ail wedi i Richie Rees amseru ei bas iddo yn ardderchog.

Llwyddodd Jason Tovey gyda’r ddau drosiad, ac un gic gosb o droed Rhys Priestland oedd unig ymateb y Scarlets.

Ond fe ddaeth yr ymwelwyr yn fwyfwy i mewn i’r gêm yn ail hanner yr hanner cyntaf ac wedi i Priestland ychwanegu ail gic gosb fe sgoriodd Scott Williams gais cyntaf y Scarlets bum munud cyn yr egwyl.

Rhedodd y canolwr ar ongl dda i dorri’r llinell amddiffynnol cyn ochr gamu heibio i Rees cyn tirio, 17-13 yn dilyn trosiad Priestland.

Ail Hanner

Dechreuodd yr ail gyfnod fel y gorffennodd y cyntaf – gyda’r Scarlets yn cael y gorau o’r tir a’r meddiant, ac roeddynt o fewn pwynt yn dilyn cic gosb Priestland wedi pum munud.

Methodd maswr y Scarlets gyda chynnig arall o bellter cyn i Tovey daro’n ôl i’r Dreigiau i adfer y pedwar pwynt o fantais.

Mwynhaodd y Dreigiau gyfnod da arall wedi hynny gan reoli’r chwarter awr nesaf, a chawsant eu haeddiant ddeg munud o’r diwedd pan drosodd Prydie fynydd o gic gosb i ymestyn y fantais i saith pwynt.

Bu rhaid iddynt oroesi dipyn o bwysau yn y munudau olaf ond daliodd sgrym y Dreigiau yn gryf a phan dasgodd y bêl yn rhydd gyda’r cloc yn goch fe giciodd Toby Faletau hi oddi ar y cae i sicrhau buddugoliaeth dda i’r Dreigiau.

Ymateb

Capten buddugol y Dreigiau, Andrew Coombs:

“Fe wnaethom ni ymddiried yn ein hunain heno ac rwyf yn credu ein bod ni’n haeddu’r fuddugoliaeth yn y diwedd. Mae ein hamddiffyn wedi gwella’n sylweddol, rydym yn gyfforddus yn ein hamddiffyn, mae ein disgyblaeth yn dda ac rydym yn ymddiried yn ein systemau.”

“Y tymor diwethaf roeddem ni’n amau ein hunain ond y tymor hwn does dim amheuaeth yma, rydym yn edrych ymlaen at groesawu timau yma ac rydym yn edrych ymlaen at eu herio.”

Mae’r canlyniad yn codi’r Dreigiau i’r trydydd safle yn nhabl y Pro12, gyda’r Scarlets yn aros yn wythfed.

.

Dreigiau

Ceisiau: Phil Price 11’, Dan Evans 20’

Trosiadau: Jason Tovey 12’, 21’

Ciciau Cosb: Tom Prydie 4’, 69’, Jason Tovey 55’

.

Scarlets

Cais: Scott Williams 34’

Trosiad: Rhys Priestland 35’

Ciciau Cosb: Rhys Priestland 17’, 27’, 45’

.

Torf: 6,777