Jonathan Davies
Fe fydd y blaen asgellwr Tom Croft o Loegr a chanolwr Cymru Jonathan Davies yn holliach ar gyfer y prawf cyntaf yfory.
Mi fethodd y ddau sesiwn ymarfer ola’r Llewod ddoe.
Yr oedd yna ychydig o chwydd yn un o fysedd troed Croft ac yr oedd Davies yn gorffwys ar ôl dwy sesiwn galed o ymarfer.
Mae’r pymtheg fydd yn dechrau wedi ennill 770 o gapiau rhyngwladol, o gymharu â 519 sydd gan chwaraewyr Awstralia. Mae’r hyfforddwr Andy Farrell yn dweud y bydd presenoldeb chwarawyr profiadol fel Paul O’Connell, Brian O’Driscoll, Adam Jones a Mike Phillips yn bwysig i’r Llewod.
‘‘Mae profiad mewn gemau mawr yn bwysig, ond rhaid cofio bod gan Awstralia rai chwaraewyr da iawn hefyd,” meddai Andy Farrell.
“Yr hyn a welwn mewn gemau pwysig fel hyn yw bod lefel y perfformiad yn codio tua 10-15%,’’ ychwanegodd.
‘‘Ar ôl y gwaith caled dros y chwe wythnos ddiwethaf yr ydym yn gwybod bod yr amser wedi dod i berfformio. Medrwch ddweud ei bod yn wythnos y prawf ac mae yna frwdfrydedd mawr o gwmpas y lle. Mae’r teimlad ar ac oddi ar y cae yn arbennig ac yr ydym wedi cael wythnos dda iawn.”
