Fe fydd India yn herio Lloegr yn rownd derfynol Tlws Pencampwyr ICC, ar ôl iddyn nhw guro Sri Lanca yng Nghaerdydd ddoe.
Galwodd India’n gywir a gofyn i Sri Lanca fatio ar lain oedd yn addas ar gyfer y bowlwyr cyflym.
Llwyddodd Ishant Sharma (3-33) a Bhuvaneshwar Kumar (1-18) i’w cyfyngu i 181-3 oddi ar 50 o belawdau.
Doedd cyfraniadau sylweddol gan y capten Angelo Mathews a Mahela Jayawardene ddim yn ddigon i Sri Lanca gyrraedd 200.
Cyrhaeddodd India y nod gyda 15 pelawd yn weddill, yn dilyn cyfraniadau o 68 gan yr agorwr, Shikhar Dhawan, a 58 gan Virat Kohli.
Bydd India yn wynebu Lloegr yn Edgbaston ddydd Sul.
Dywedodd capten Sri Lanca, Angelo Mathews: “Dydy India ddim wedi colli mor belled ac maen nhw wedi bod yn chwarae criced da iawn.
“Rydyn ni i gyd yn gwybod eu bod nhw’n bencampwyr y byd ar hyn o bryd ac mae’n anodd iawn mynd ben-ben â nhw.
“Maen nhw wedi bod yn dda iawn, felly pob lwc iddyn nhw.”
Er mwyn ennill ddydd Sul, fe fydd rhaid i India allu rheoli batwyr Lloegr fel Alastair Cook a Jonathan Trott.
Ychwanegodd Angelo Mathews nad oedden nhw’n bryderus am nifer o brotestiadau gwleidyddol ddigwyddodd yng Nghaerdydd yn ystod y gêm ddoe.
Daeth protestwyr i’r cae ddwy waith yn cario baneri coch ac yn protestio ar ran pobol Tamil yn erbyn ymdriniaeth llywodraeth Sri Lanca ohonyn nhw.
Dywedodd Mathews: “Do’n i ddim wir yn bryderus.
“Dydyn ni, fel cricedwyr, ddim yn bryderus am yr hyn sy’n digwydd o’n cwmpas ni.
“Roedd hi’n anffodus bod yna ymate heddiw ar ôl y gêm yn yr Oval, ond alla i ddim wir gwneud sylw.”
Mae yna le i gredu bod y protestwyr yn ymateb hefyd i ymosodiad ar bobol Tamil yn Surrey yr wythnos diwethaf.
