Scarlets 29–6 Glasgow

Cododd y Scarlets i bedwar uchaf y RaboDirect Pro12 gyda buddugoliaeth gartref dda yn erbyn y tîm a oedd ar y brig, Glasgow, ar Barc y Scarlets nos Wener.

Rheolodd Bois y Sosban y rhan helaeth o’r gêm ac roedd cicio cywir Owen Williams a cheisiau Ken Owens a Liam Williams yn ddigon i sicrhau buddugoliaeth gyfforddus i’r tîm cartref.

Hanner Cyntaf

Dechreuodd y Scarlets yn gryf ac roeddynt yn llawn haeddu chwe phwynt o fantais wedi chwarter awr diolch i ddwy gic gosb o droed Owen Williams.

Roedd Ken Williams yng nghanol popeth i’r tîm cartref a doedd fawr o syndod mai’r bachwr sgoriodd y cais agoriadol hanner ffordd trwy’r hanner. Enillodd dir da gyda bylchiad cyn gorffen y symudiad trwy blymio dros y gwyngalch. 13-0 yn dilyn trosiad Williams.

Ciciodd Ruaridh ddwy gic gosb wedi hynny yn dilyn troseddau gan Owens a Samson Lee ond ychwanegodd Williams gôl adlam at gyfanswm y Cymry hefyd wrth i’r Scarlets fynd i mewn ar yr egwyl ddeg pwynt ar y blaen.

Ail Hanner

Methodd Williams am y tro cyntaf yn gynnar yn yr ail hanner ond doedd fawr o ots wrth i Liam Williams groesi am gais yn fuan wedyn. Dwynodd y blaenwyr y bêl o lein amddiffynnol Glasgow a lledodd y cefnwyr hi o’r chwith i’r dde cyn i’r cefnwr dirio.

Trosodd Owen Williams y cais cyn ychwanegu dwy gic gosb arall i roi mantais o 23 pwynt i’r Scarlets gyda chwarter y gêm ar ôl.

Yr unig siom felly o bosib yw na lwyddodd Bois y Sosban i gipio pwynt bonws yn yr ugain munud olaf ond llwyddodd Glasgow i’w cadw yn eu hanner eu hunain am rannau helaeth o’r cyfnod hwnnw.

Bu bron i’r eilydd fewnwr, Gareth Davies, dirio yn dilyn rhediad gwych yn yr eiliadau olaf ond penderfynodd y dyfarnwr teledu nad oedd digon o dystiolaeth i ganiatáu’r cais.

Buddugoliaeth dda i’r Scarlets serch hynny a buddugoliaeth sydd yn eu codi dros y Gweilch i’r pedwerydd safle holl bwysig yn nhabl y Pro12. Ond, gall eu cymdogion gipio’r safle hwnnw’n ôl gyda buddugoliaeth yn Treviso nos yfory.

Ymateb

Seren y gêm, blaenasgellwr y Scarlets, Aaron Shingler:

“Fe weithion ni’n dda fel tîm, ei chadw hi’n dynn, cydweithio’n effeithiol fesul dau a thri, ac er clod i Owen Williams, fe wobrwyodd e’ ni gyda’r pwyntiau.”

.

Scarlets

Ceisiau: Ken Owens 18’, Liam Williams 46’

Trosiadau: Owen Williams 19’, Owen Williams 48’

Ciciau Cosb: Owen Williams 4’, 14’, 51’, 60’

Gôl Adlam: Owen Williams 25’

.

Glasgow

Ciciau Cosb: Ruaridh Jackson 21’, 27’