Y Dreigiau’n Deilchion

Dreigiau 3–60 Glasgow

Cafodd y Dreigiau gweir go iawn gan Glasgow yn y RaboDirect Pro12 ar Rodney Parade nos Wener.

Sgoriodd yr ymwelwyr dri chais yn yr hanner cyntaf cyn ychwanegu pump arall yn yr ail gyfnod wrth sicrhau buddugoliaeth gyfforddus a phwynt bonws yn ne ddwyrain Cymru.

Hanner Cyntaf

Dechreuodd y Dreigiau’n dda gyda thri phwynt o droed Tom Prydie wedi dim ond dau funud, ond roedd Glasgow yn gyfartal diolch i gic gosb Duncan Weir ddau funud yn ddiweddarach.

Ond er gwaethaf deg munud agoriadol digon cyfartal fe lwyr reolodd yr Albanwyr yr hanner awr wedi hynny tan yr egwyl gan sgorio tri chais yn y broses.

Daeth y cyntaf o’r rheiny wedi chwarter awr pan groesodd y canolwr, Mark Bennett, ar ôl cyfnod hir o bwyso ac ailgylchu gan Glasgow.

Sgoriodd Nikala Matawalu yr ail bum munud yn ddiweddarach pan adlamodd cic obeithiol Henry Pyrgos yn garedig i’r asgellwr .

Ac roedd y gêm fwy neu lai drosodd ddau funud cyn yr egwyl pan diriodd Alex Dunbar y trydydd. Rhoddodd sgrym gref sylfaen da i Glasgow yn y ddau ar hugain cyn i’r canolwr dorri trwy’r amddiffyn gyda rhediad da ar y siswrn.

Trosodd Weir y tri chais ac ychwanegodd gic gosb arall hefyd wrth i’w dîm orffen yr hanner bedwar pwynt ar hugain ar y blaen, 3-27.

Ail Hanner

Cafodd y Dreigiau ddechrau da i’r ail hanner hefyd gan gael y gorau o’r tir a’r meddiant yn ugain munud cyntaf yr ail gyfnod. Ond methodd y Cymry â manteisio ar hynny ac agorodd y llifddorau i Glasgow yn y chwarter olaf.

Sicrhawyd y pwynt bonws ar yr awr pan dorodd Dunbar drwy’r amddiffyn cyn dadlwytho i’r eilydd, Taylor Paris a chroesodd yntau’n rhy hawdd o lawer.

Roedd hyder y tîm cartref wedi llwyr ddiflannu erbyn hyn a phrin y gwelwyd tacl yn y chwarter awr olaf.

Tiriodd y clo, Tim Swinson, ddwywaith, a chafodd yr eilyddion, Josh Strauss a Scott Wight gais yr un. Roedd dau drosiad i Wight hefyd i ychwanegu at bump Weir cyn iddo ef adael y cae.

Perfformiad gwych gan Glasgow rhaid dweud ond amddiffyn torcalonnus gan y Dreigiau, 3-60 y sgôr terfynol.

Nid yw’r canlyniad hwn yn newid llawer yn nhabl y Pro12 serch hynny gyda’r Dreigiau’n aros yn ail o’r gwaelod a Glasgow yn ail o’r brig.

.

Dreigiau

Cic Gosb: Tom Prydie 2’

.

Glasgow

Ceisiau: Mark Bennett 16’, Nikala Matawalu 20’, Alex Dunbar 38’, Taylor Paris 59’, Tim Swinson 65’, 75’ Josh Strauss 68’, Scott Wight 80’

Trosiadau: Duncan Weir 17’, 21’, 38’, 60’, 66’, Scott Wight 69’, 80’

Ciciau Cosb: Duncan Weir 4’, 27’

.

Dreigiau