Charlton 5–4 Caerdydd

Colli fu hanes Caerdydd yn erbyn Charlton yn y Valley nos Fawrth er iddynt fod ddwy gôl ar y blaen hanner ffordd trwy’r hanner cyntaf.

Mae’r Adar Gleision yn disgyn oddi ar frig y Bencampwriaeth ar ôl ildio pum gôl mewn dim ond hanner awr o boptu hanner amser.

Peniodd Heidar Helguson gic gornel Don Cowie i gefn y rhwyd wedi dim ond pedwar munud i roi Caerdydd ar y blaen a dyblwyd mantais yr ymwelwyr hanner ffordd trwy’r hanner pan fanteisiodd Joe Mason ar lanast amddiffynnol yng nghwrt cosbi Charlton.

Ond roedd y tîm cartref yn gyfartal erbyn yr egwyl diolch i ddwy gôl gan Johnnie Jackson. Manteisiodd ar gamgymeriad gan gôl-geidwad Caerdydd, David Marshall, i rwydo’r gyntaf o ochr y cwrt cosbi cyn ychwanegu ail ar drothwy hanner amser gyda pheniad o gic gornel Salim Kerkar.

Dechreuodd Charlton yr ail hanner ar dân hefyd ac roeddynt dair gôl ar y blaen o fewn ugain munud i’r ail ddechrau.

Daeth y gyntaf pan hwyliodd cic rydd hir Dale Stephens dros ben pawb yn y cwrt cosbi gan gynnwys Marshall yn y gôl, ac ychwanegodd Danny Haynes un arall bum munud yn ddiweddarach gyda pheniad yn y cwrt chwech.

Gwyrodd Rob Hulse groesiad Kerkar i’r gornel isaf i’w gwneud hi’n bump toc wedi’r awr ac roedd gan Gaerdydd fynydd i’w ddringo.

Y Cymry a gafodd y geiriau olaf serch hynny gyda goliau Craig Noone ac Aron Gunnarsson yn yr amser a ganiateir am anafiadau ar ddiwedd y gêm ond rhy ychydig rhy hwyr oedd hi i’r Adar Gleision.

Mae tîm Malky Mackay yn disgyn i’r trydydd safle yn nhabl y Bencampwriaeth yn dilyn y canlyniad hwn gan i Crystal Palace roi crasfa gartref i Ipswich, a gan i Middlesbrough gipio pwynt yn Nottingham Forest.

.

Charlton

Tîm: Hamer, Morrison, Kerkar, Solly, Cort, Jackson, Stephens, (Hollands 90), Haynes (Wright-Phillips 68’), Pritchard, Dervite, Hulse

Goliau: Jackson 39’, 45’, Stephens 54’, Haynes 59’, Hulse 65’

Cardiau Melyn: Pritchard 32’, Stephens 86’, Solly 73’, Morrison 60’

Caerdydd

Tîm: Marshall, Taylor, Hudson, Turner, Connolly, Whittingham, Cowie (Gunnarsson 65’), Noone, Frei (Kim Bo-Kyung 65’) Mason, Helguson (Gestede 73’)

Goliau: Helguson 4’, Mason 24’, Noone 90’, Gunnarsson 90’

Cardiau Melyn: Taylor 61’, Turner 83’, Connolly 44’

Torf: 15,764