Bangor 4–1 Lido Afan

Profodd Bangor yn rhy gryf i Lido Afan yn Nantporth brynhawn Sadwrn wrth rwydo pedair yn erbyn yr ymwelwyr o Bort Talbot.

Rhoddodd Chris Jones Bangor ar y blaen yn gynnar gydag ergyd dda ac er i Fangor reoli gweddill yr hanner hefyd roedd Lido’n gyfartal erbyn yr egwyl diolch i Luke Borrelli.

Rhoddodd Les Davies Bangor yn ôl ar y blaen toc cyn yr awr gyda’i gôl gyntaf o’r tymor cyn i Jones sgorio ei ail o’r gêm i’w gwneud hi’n dair.

Cwblhaodd Damien Allen y sgorio gydag ergyd gadarn yn y munudau olaf yn dilyn gwaith creu yr eilydd ifanc, John Owen.

Mae’r canlyniad yn cadw Bangor ar y brig tra mae Lido yn disgyn i’r nawfed safle.

(Torf – 522)

Caerfyrddin 0–0 Y Seintiau Newydd

Methodd y Seintiau â sgorio am y drydedd gêm yn olynol wrth iddynt orfod bodloni ar bwynt yn unig yn erbyn Caerfyrddin ar Barc Waun Dew brynhawn Sadwrn.

Fe sgoriodd y Seintiau ym mhob gêm gynghrair y tymor diwethaf a dyma’r tro cyntaf erioed iddynt fynd am dair gêm yn Uwch Gynghrair Cymru heb sgorio.

Tipyn o bluen yn het Caerfyrddin felly a phwynt haeddianol i dîm Mark Aizlewood.

Nid yw’r canlyniad yn newid dim yn y tabl serch hynny wrth i’r Seintiau aros yn drydydd a Chaerfyrddin yn seithfed.

(Torf – 297)

Gap Cei Connah 1–2 Aberystwyth

Daeth rhediad da diweddar Cei Connah i ben yn Stadiwm Glannau Dyfrdwy brynhawn Sadwrn wrth i ddwy gôl gynnar sicrhau buddugoliaeth gyntaf y tymor i Aberystwyth.

Crymanodd Matty Collins yr ymwelwyr ar y blaen wedi dim ond dau funud cyn i Jordan Follows ddyblu’r fantais o’r smotyn wedi i Glyndwr Hughes gael ei lorio yn y cwrt cosbi.

Roedd y tîm cartref yn meddwl eu bod yn ôl yn y gêm ar ddechrau’r ail hanner ond cafodd y gôl ei gwrthod oherwydd trosedd gan Ricky Evans ar y gôl-geidwad, James Wood.

Fe wnaeth Cei Connah sgorio yn y diwedd diolch i foli Jamie Petrie yn yr eiliadau olaf ond gôl gysur yn unig oedd honno.

Derbyniodd capten y tîm cartref, Craig Jones, gerdyn coch hwyr hefyd wedi iddo daro Gavin Cadwallader â’i ben.

Mae Cei Connah yn aros yn bedwerydd er gwaethaf y canlyniad ond mae Aberystwyth yn codi oddi ar waelod y tabl i’r unfed safle ar ddeg.

(Torf – 165)

Llanelli 0–3 Y Drenewydd

Parhau mae trafferthion Llanelli ar ddechrau’r tymor yn dilyn cweir gan y Drenewydd ar Stebonheath brynhawn Sadwrn.

Yn dilyn hanner cyntaf di sgôr fe roddodd Ian Edmunds yr ymwelwyr ar y blaen yn gynnar yn yr ail hanner pan sgoriodd yn uniongyrchol o gic gornel. A dyblodd Nicky Ward y fantais toc wedi’r awr gyda chic rydd gelfydd o ochr y cwrt cosbi.

Collodd y Cochion eu pennau wedi hynny a bu rhaid iddynt orffen y gêm gydag wyth dyn yn dilyn tri cherdyn coch. Anfonwyd Ashley Evans o’r cae wedi iddo dderbyn ail gerdyn melyn a dilynodd Luke Bowen a Chris Venables ef i’r ystafell newid ar ôl defnyddio iaith anweddus.

Ac i rwbio’r halen yn y briw fe ychwanegodd Gareth Partridge drydedd gôl gyda foli wych yn yr eiliadau olaf.

Y Drenewydd felly yw prif symudwyr y penwythnos yn codi o’r degfed safle i chweched yn y tabl. Mae Llanelli ar y llaw arall yn disgyn i’r degfed safle gyda gwahaniaeth goliau’n unig yn eu cadw allan o safleoedd y gwymp.

(Torf – 154)

Port Talbot 4–4 Airbus

Cafwyd gêm y penwythnos yn Stadiwm GenQuip brynhawn Sadwrn wrth i Bort Talbot ac Airbus rannu’r pwyntiau ac wyth gôl mewn gêm lawn cyffro.

Rhwydodd Jeff White y gôl agoriadol yn dilyn camgymeriad gan Ben Chapman yn y gôl i Airbus a sgoriodd David Brooks yr ail o’r smotyn ar ôl iddo gael ei lorio gan Ian Kearney.

Ond roedd yr ymwelwyr yn gyfartal erbyn yr egwyl yn dilyn goliau Wayne Riley a Glenn Rule.

Rhoddodd Brooks Bort Talbot yn ôl ar y blaen yn gynnar yn yr ail hanner ond ychydig funudau a barodd y fantais cyn i Ryan Wade unioni i’r gogleddwyr.

Sgoriodd White ei ail ef a phedwerydd y Gwŷr Dur i’w rhoi ar y blaen eto cyn i Airbus unioni drachefn gyda gôl i’r eilydd, Jordan Johnson, ddeg munud o’r diwedd.

Mae’r canlyniad yn cadw Port Talbot yn y pumed safle ac Airbus yn wythfed er mai dim ond un pwynt sydd yn gwahanu’r ddau dîm.

(Torf – 113)

Bala 1–2 Prestatyn

Tarodd Prestatyn yn ôl i guro’r Bala ar Faes Tegid yng ngêm fyw Sgorio brynhawn Sadwrn. Rhoddodd Lee Hunt y tîm cartref ar y blaen ond sgoriodd Andy Parkinson a Ross Stephens i gipio’r fuddugoliaeth i’r ymwelwyr.

(Torf – 205)