Casnewydd 0–0 Forest Green
Sicrhaodd Casnewydd bwynt yn erbyn Forest Green ar Barc Sbyty heddiw er gwaethaf y ffaith iddynt chwarae awr o’r gêm gyda dim ond deg dyn. Di sgôr oedd hi yn y gêm yn Uwch Gynghrair y Blue Square wrth i dîm Justin Edinburgh aros allan o safleoedd y gwymp o drwch blewyn.
Derbyniodd Ismail Yakubu ei gerdyn melyn cyntaf hanner ffordd trwy’r hanner cyntaf ac anfonwyd yr amddiffynnwr oddi ar y cae wedi 32 munud yn dilyn trosedd ar James Norwood.
Ond er i’r deg dyn orfod treulio dipyn o’r ail hanner heb y bêl fe gawsant ambell gyfle i sgorio serch hynny. Bu rhaid i Sam Russell arbed ymdrech Elliot Buchanan ym munud cyntaf yr ail hanner. Ac arbedodd Russell yn dda toc wedi’r awr hefyd pan ergydiodd Nat Jarvis yn dilyn croesiad Sam Foley.
Arbedodd Russel ergyd Jake Harris yn hwyr yn y gêm hefyd wrth iddi orffen yn ddi sgôr.
Mae Casnewydd yn aros yn yr ugeinfed safle yn nhabl Uwch Gynghrair y Blue Square er gwaethaf y pwynt. Ond y newyddion da i’r tîm o Gymru yw’r ffaith i ganlyniadau eraill fynd o’u plaid heddiw wrth i’r pedwar isaf i gyd golli
