Mae Mike van der Hoorn, is-gapten Clwb Pêl-droed Abertawe, wedi llofnodi cytundeb newydd a fydd yn ei gadw yn Stadiwm Liberty y tymor nesaf.
Roedd yna opsiwn i ymestyn y cytundeb am dymor arall.
Mae’r amddiffynnwr canol, sydd wedi bod yn arwain y tîm yn absenoldeb Leroy Fer, wedi chwarae ym mhob un o’r 44 o gemau yn y Bencampwriaeth y tymor hwn.
Daw’r newyddion am y cytundeb ar ôl i obeithion tila’r Elyrch o gyrraedd y gemau ail gyfle ddod i ben ar ôl gêm gyfartal 2-2 yn erbyn Hull yn Stadiwm Liberty ddoe (dydd Sadwrn, Ebrill 27).
“Mae’n gryn hwb i ni ac yn un amlwg, dw i’n credu,” meddai Graham Potter, y rheolwr.
“Mae e wedi bod yn wych i ni.
“Mae e wedi datblygu’n arweinydd, fel person ac fel pêl-droediwr.
“Mae e’n un o amddiffynwyr canol gorau’r Bencampwriaeth a’r her iddo fe yw bod yn amddiffynnwr canol yn yr Uwch Gynghrair, a gobeithio y byddwn ni’n ei helpu i gyrraedd y fan honno.
“Mae’n newyddion gwych i ni.”
‘Gwaith i’w wneud’
Ar ôl i’r garfan ifanc greu argraff y tymor hwn, mae’n debygol y bydd Graham Potter a’r clwb yn wynebu colli nifer ohonyn nhw dros yr haf wrth i glybiau ddod amdanyn nhw.
Yn eu plith mae Daniel James, oedd bron â symud i Leeds ym mis Ionawr, a Matt Grimes, sy’n cael ei ystyried yn un o chwaraewyr gorau’r clwb y tymor hwn.
Mae Graham Potter yn dweud bod ganddyn nhw i gyd waith i’w wneud dros yr haf.
“Mae gyda ni gnewyllyn criw da, llawer o fois da a chanddyn nhw ysbryd, ac maen nhw’n dysgu ac yn dechrau ar eu taith.
“Dw i’n edrych ymlaen, felly, at geisio siapio’r garfan hon a’i gwella.”
