Danny Rose - sgoriwr Casnewydd (Llun o wefan CPD Casnewydd)
Casnewydd 1 – 1 Stockport County
Mae rhediad siomedig Casnewydd heb ennill yn parhau wedi gêm gyfartal ar Barc Sbytty neithiwr.
Er hynny, bydd Anthony Hudson yn falch o roi terfyn ar rediad o bum colled yn olynol a sicrhau pwynt gan obeithio ysgafnhau’r pwysau sydd arno.
Ar un pryd roedd yn edrych yn debygol y byddai Casnewydd yn cipio’r fuddugoliaeth.
Roedden nhw ar y blaen wedi 31 munud diolch i gôl gan Danny Rose, oedd wedi edrych fel bygythiad cyn hynny.
Y tîm cartref reolodd yr hanner cyntaf a daeth cyfleoedd i Sam Foley, David Pipe a Craig McAllister, tra bod yr ymwelwyr heb lwyddo i gael ergyd ar gôl.
Digon digyffro oedd yr ail hanner, er bod Stockport yn meddwl eu bod yn gyfartal gyda 15 munud yn weddill diolch i Chris Blackburn, ond dyfarnwyd nad oedd y bêl wedi croesi’r llinell.
Roedd yn rhybudd i’r tîm cartref, a gyda llai na 10 munud ar ôl llwyddo Tom Elliott i benio i’r rhwyd i’r ymwelwyr er mawr siom i gefnogwyr Casnewydd.
Perfformiad i adeiladu arno
“Ro’n i’n meddwl y gallem ni fod wedi selio’r fuddugoliaeth ynghynt yn y gêm, ond ro’n i’n meddwl ei fod yn berfformiad gwych” meddai Anthony Hudson ar ôl y gêm.
“Ydy, mae’n teimlo ychydig bach fel colli.”
“Mae’n berfformiad arall y gallwn ni adeiladu arno. Rwy’n credu yn y grŵp yma a dwi’n meddwl y gallwn ni godi pethau ac y byddwn ni’n iawn“ ychwanegodd Hudson.
Tîm Casnewydd:
Thompson, Robson, Warren, Andrew Hughes, Miller, Rose, Rogers, Pipe (Gilligan 60), McAllister, Foley (Knights 75), Jarvis (Buchanan 84)
Eilyddion na ddefnyddiwyd: Harrison, Hatswell
