Mark Creighton - ei angen yn amddiffyn Wrecsam (Llun o wefan CPD Wrecsam)
Gohebydd clwb CPD Wrecsam sy’n dadansoddi problemau Dean Saunders ar sail eu colled siomedig yn erbyn Caer Efrog ddydd Sadwrn.

Mae cymaint haws ysgrifennu am eich tîm pan maen nhw’n chwarae’n dda ac yn ennill. Roeddwn yn y gêm yn erbyn Caer Efrog ac o’r eiliad y clywais fod Mayebi a Westwood yn chwarae yn lle Maxwell a Creighton roeddwn yn nerfus.

Mae Maxwell yn rhoi hyder i’w amddiffynwyr. Mae llawer o goliau Wrecsam wedi o ganlyniad i Creighton a  Knight Percival yn pasio’r bêl i’w gilydd, sugno’r gwrthwynebwyr ac yna thorri’n gyflym.

Mae Creighton yn siarad trwy gydol y gêm yn gwneud yn siŵr bod  ei gyd amddiffynwyr a’r chwaraewyr canol cae yn gwneud eu gwaith yn iawn.

Doedd dim math o hyder yn chwarae amddiffynnol a chanol cae Wrecsam ddydd Sadwrn ac ar ôl 23 munud roedden nhw 3 – 0 ar ei hôl hi.

A bod yn deg yr oedd Caerefrog yn chwarae’n slic iawn, ond ychydig iawn o wrthwynebiad a roddodd Wrecsam i’w ymosodiadau. Y sgorwyr oedd Patrick McLaughlin, Ashley Chambers a chyn ymosodwr Wrecsam, Rhyl a Bangor,  Jamie Reed.

Ar derfyn yr hanner cyntaf roedd Jake Speight yn rhydd gyda dim ond y gôl-geidwad i’w guro, roedd Tolley gydag o am gael gôl i rwyd wag, ond ceisio am gôl wnaeth Speight a methu.

Daeth Creighton ymlaen am yr ail hanner a chafodd Caerefrog yr un cyfle gwirioneddol wedi’r egwyl. Tynnwyd Curtis Obeng ac Andy Morrell oddi ar y cae am eu bod nhw hefyd yn aneffeithiol ar y cyfan.

Roedd y cefnogwyr yn ddig iawn a bydd disgwyl i Saunders roi Maxwell a Creighton yn ôl yn y tîm ar gyfer y gêm heno yn Southport. I wneud bywyd rhywfaint yn haws i Saunders efallai, mae gan Mayebi anaf ac felly gellir rhoi Maxwell yn ôl heb golli wyneb. Bydd rhaid iddo golli ychydig o’r wyneb hwnnw wrth ail sefydlu Creighton yn yr amddiffyn cofiwch.

Pe bai Wrecsam yn ail afael ar y safon o chwarae a’i gyrrodd i frig y Gyngres gallwn gryfhau ein safle ac aros wrth gynffonau Gateshead a Luton. Os fydd Wrecsam yn chwarae’n debyg i’r ddwy gêm ddiwethaf gallaf weld y tîm yn disgyn ymhellach i lawr y tabl.