Gareth Bale
Mae rheolwr Tottenham, Harry Redknapp wedi dweud bod Gareth Bale yn rhan allweddol o gynlluniau’r clwb.
Ddoe dywedodd y Cymro na fyddai’n troi ei gefn ar gyfle i chwarae dramor pe bai’n cael cynnig.
Mae Bale wedi denu sylw nifer o brif glybiau Ewrop gan gynnwys Real Madrid a Barcelona.
Ond mae rheolwr Tottenham wedi dweud y byddai gwerthu Bale yn difetha ei gynlluniau at y dyfodol.
“Os ydych chi’n ceisio adeiladu clwb, allwch chi ddim gwerthu Gareth,” meddai Harry Redknapp.
“Pe bai’r clwb yn gwerthu Gareth fe fyddai chwaraewyr eraill gan gynnwys Luka Modric yn awyddus i adael wedyn.
“Rwy’n siŵr y byddai’n gwerthu am bris teidi, ond sut fyddwch chi’n dod o hyd i rywun i gymryd ei le? Mae’n anodd iawn.
“Ond mae’r grym gan y chwaraewyr. Pe bai Gareth neu ei asiant yn dweud ei fod o eisiau gadael y clwb fyddwn i ddim yn gallu gwneud llawer iawn am y peth.
“Ond dw i ddim yn gweld hynny’n digwydd gan ei fod wedi arwyddo cytundeb newydd.
“Dw i ddim yn credu ei fod yn barod i chwarae gydag un o brif glybiau Ewrop eto. Rwy’n credu bod angen iddo dreulio rhai blynyddoedd yn chwarae gartref.
“Mae yn foi ifanc ac mae ganddo ddigon o amser i chwarae dramor yn y dyfodol.”
