Scott Sinclair - ar y rhestr fer
Mae blaenwr Abertawe, Scott Sinclair, ar y rhestr fer i fod yn chwaraewr gorau’r flwyddyn yn y Bencampwriaeth.
Fe gafodd ei ddewis trwy bleidlais cefnogwyr ar y We ac wedyn gan banel o feirniaid arbenigol.
Fe fydd yn cystadlu am y teitl yn erbyn dau arall sydd mewn timau ar frig yr adran – Grant Holt o Norwich ac Adel Taarabt o QPR.
Sinclair yw prif sgoriwr yr Elyrch gyda 21 gôl hyd yn hyn y tymor yma, gan lenwi bwlch mawr yn eu gallu i sgorio.
Roedd wedi ymuno â’r clwb o Chelsea ym mis Awst am bris o £500,000 – ond fe allai hwnnw godi i £1 miliwn, yn dibynnu ar ei lwyddiant yn y Liberty.
