Francesco Guidolin (Roberto Vicario/CC3.0)
Mae rheolwr Abertawe wedi herio ei chwaraewyr i drechu Chelsea yn Stadiwm Liberty b’nawn fory am dri.
Nid yw’r Elyrch erioed wedi maeddu’r Gleision yn ystod eu cyfnod yn Uwch Gynghrair Lloegr.
Fe lwyddodd Chelsea i’w trechu 5-0 yn Stadiwm Liberty y tymor diwethaf – colled gartref drymaf Abertawe ers 24 mlynedd.
Y tro diwethaf i Abertawe guro Chelsea oedd ar Gae’r Vetch yn 1981.
Dywedodd rheolwr Abertawe Francesco Guidolin bod ei dîm yn barod i newid hanes y clwb ac y gallai’r Elyrch chwarae yn “ymosodol gyda dewrder a chymeriad”.
Mae Abertawe gyda 37 pwynt ar hyn o bryd – 10 pwynt yn glir o’r safleoedd cwymp. Mae Francesco Guidolin wedi dweud y byddai triphwynt arall yn sicrhau tymor arall yn yr Uwch Gynghrair.
