Mae Erol Bulut, rheolwr tîm pêl-droed Caerdydd, wedi cadarnhau bod Aaron Ramsey yn holliach ar gyfer y gêm ddarbi fawr yn erbyn Abertawe ddydd Sul (Awst 25).
Fe wnaeth chwaraewr canol cae ymosodol Cymru droi ar ei ffêr yn ystod y gêm yn erbyn Burnley, ond dywed Bulut ei fod e wedi bod yn ymarfer yn llawn gyda’r garfan.
Mae’n dweud nad yw’r anaf yn ddifrifol, er ei bod yn “edrych yn ddrwg iawn” ar y pryd.
“Yn sicr, mae’n hwb,” meddai am y ffaith fod Aaron Ramsey ar gael i herio Abertawe.”
‘Mwy na gêm ddarbi’
Yn ôl Erol Bulut, fydd yn rheoli’r Adar Gleision mewn gêm ddarbi am y pumed tro, mae hon “yn fwy na gêm ddarbi”.
“Does dim angen i fi siarad ryw lawer am y gemau sydd wedi bod,” meddai.
“Darbi yw hon, mwy na darbi, i ni ac iddyn nhw.
“I fy chwaraewyr i, mae angen iddyn nhw fod yn barod ar gyfer y gêm ddydd Sul.
“Y tymor diwethaf, ges i ddigon o sgyrsiau gyda chefnogwyr ar y stryd, a phan es i allan i fwytai.
“Dw i’n gwybod beth mae hyn yn ei olygu i’r cefnogwyr, i’r clwb ac i ni.
“Nid dim ond gêm ddarbi yw hon.
“Mae’n ddarbi fawr.
“Rhaid i chi ei hennill hi.”
