Fydd Aaron Ramsey ddim yn chwarae i dîm pêl-droed Caerdydd eto y tymor hwn oherwydd anaf.
Dim ond 13 o gemau mae capten Cymru wedi’u chwarae ers iddo fe ddychwelyd i’r Adar Gleision cyn dechrau’r tymor hwn.
A dim ond unwaith mae e wedi dechrau gêm ers gwella o anaf i’w goes fis diwethaf.
Mae gan Gaerdydd dair gêm yn weddill o’u hymgyrch yn y Bencampwriaeth.
Wrth ymateb i’r newyddion, mae Erol Bulut, rheolwr Caerdydd, wedi aildanio ffrae bosib â Chymru, gan awgrymu y dylai “beidio meddwl” am y tîm cenedlaethol am y tro.
Mae gan dîm Rob Page gêm gyfeillgar yn erbyn Slofacia ar Fehefin 9, ac fe allai Ramsey fod yn holliach ar gyfer honno.
Dywed Bulut y bydd e allan am o leiaf dair wythnos, a bod yn “rhaid iddo fe wella a bod yn holliach”.
“Dw i’n credu bod yn rhaid iddo fe baratoi ei hun ar gyfer y tymor newydd a pheidio meddwl am y tîm cenedlaethol, p’un a fydd e’n chwarae ai peidio,” meddai.
