Y gell gosb: “Un o’r penderfyniadau gwaethaf erioed”

Mae Lee Trundle yn dweud bod cyflwyno’r gell gosb i gemau pêl-droed yng Nghymru’n “un o’r penderfyniadau gwaethaf erioed”.

Daw hyn ar ôl i Gymdeithas Bêl-droed Cymru gyhoeddi’r arbrawf, fydd yn gweld chwaraewyr sy’n derbyn cerdyn melyn am sarhau swyddogion yn gorfod gadael y cae mewn gemau llawr gwlad i oedolion ac ieuenctid ar gyfer tymor 2024-25.

Cafodd y penderfyniad i gyflwyno’r arbrawf ei gymeradwyo’n unfrydol gan Fwrdd Gêm Gymunedol Cymdeithas Bêl-droed Cymru, yn dilyn treialu’r cynllun mewn chwe chystadleuaeth ar lawr gwlad y tymor hwn.

Mae’r gell gosb wedi’i defnyddio mewn bron i 1,300 o gemau hyd yn hyn, ac mae lle i gredu ei bod wedi gostwng nifer y rhybuddion i chwaraewyr am sarhau swyddogion gan 34% ers y tymor diwethaf, gyda nifer y cardiau coch am y drosedd honno’n gostwng gan 32%.

Mewn arolwg, dangosodd y rhan fwyaf o glybiau gefnogaeth i’r cynllun.

Yn ôl y cynllun, bydd cerdyn melyn am sarhau swyddogion yn arwain at orfod gadael y cae am ddeng munud.

Bydd cardiau melyn cyffredin yn aros yr un fath am droseddau eraill.

Mae disgwyl i’r arbrawf gael ei gyflwyno i gemau ieuenctid maes o law hefyd.

Yn ôl Noel Mooney, Prif Weithredwr Cymdeithas Bêl-droed Cymru, mae hwn yn “gam sylweddol ar y daith i wneud pêl-droed y gamp fwyaf cynhwysol, hygyrch a llwyddiannus yng Nghymru”.

Yn ôl Mark Adams, cadeirydd Bwrdd Gêm Gymunedol Cymdeithas Bêl-droed Cymru, roedd angen gweithredu er mwyn lleihau nifer y swyddogion sy’n cefnu ar bêl-droed am eu bod nhw wedi cael eu sarhau a’u camdrin, a phryderon fod nifer y swyddogion sy’n barod i ddyfarnu wedi gostwng.