Bydd tîm pêl-droed Cymru’n anelu i godi i frig eu grŵp yn ymgyrch ragbrofol Ewro 2024, wrth iddyn nhw groesawu Armenia i Gaerdydd heno (nos Wener, Mehefin 16).

Mae Cymru’n ail ar hyn o bryd ar wahaniaeth goliau, yn dilyn gêm gyfartal yn erbyn Croatia, sydd ar y brig, a buddugoliaeth dros Latfia.

Bydd tîm Rob Page yn herio Twrci nos Lun (Mehefin 19) hefyd, ac mae’r rheolwr yn dweud eu bod nhw’n llygadu’r chwe phwynt dros y ddwy gêm, ond mae’n dweud y byddai buddugoliaeth gartref a gêm gyfartal oddi cartref yn dderbyniol.

Roedd y gêm gyfartal yn erbyn Croatia’n “teimlo fel buddugoliaeth” ar ôl “siom” yng Nghwpan y Byd, meddai.

Bydd Cymru’n wynebu tîm Armenia sydd 71 lle islaw’r rhestr ddetholion.

Tîm Cymru

Ar ôl methu’r gemau agoriadol, mae’r golwr Wayne Hennessey a’r amddiffynnwr Ben Davies ar gael eto ar ôl gwella o anafiadau.

Un arall sy’n holliach yw’r ymosodwr Brennan Johnson, a hwnnw heb fod ar gael ar ôl tynnu’n ôl o’r garfan i wynebu Croatia a Latfia oherwydd anaf.

Mae Neco Williams wedi gwella o anaf i’w ên.

Gyda Chymru’n frith o opsiynau ymosodol, bydd yn rhaid i Brennan Johnson frwydro am ei le, tra bydd yn rhaid i Hennessey frwydro yn erbyn Danny Ward am grys y golwr.

Dydy David Brooks ddim wedi chwarae dros Gymru ers bron i ddwy flynedd ar ôl cael diagnosis o ganser, ond mae’n holliach erbyn hyn ac yn barod i frwydro am ei le, er bod Rob Page yn dweud y gallai dechrau’r ddwy gêm fod gam yn rhy bell ar hyn o bryd.

Gemau’r gorffennol

Mae Cymru wedi herio Armenia ddwywaith o’r blaen, a hynny yn ystod ymgyrch ragbrofol Cwpan y Byd 2002.

Gorffennodd y ddwy gêm yn gyfartal – 2-2 yn Yerevan a 0-0 yng Nghaerdydd.

Daeth rhediad Cymru o naw gêm heb fuddugoliaeth i ben ym mis Mawrth, wrth iddyn nhw guro Latfia o 1-0.

Ers iddyn nhw ennill pum gêm yn olynol rhwng Tachwedd 2020 a Mawrth 2021, dim ond dwy allan o 21 o gemau mae Armenia wedi’u hennill ac maen nhw heb fuddugoliaeth yn eu naw gêm diwethaf.

Mae Cymru’n ddi-guro mewn 12 o gemau rhagbrofol ar gyfer yr Ewros, a daeth eu colled ddiwethaf yn erbyn Lloegr yn 2011.

Mae Armenia wedi ildio 29 o goliau mewn deg gêm gystadleuol.