Bydd S4C yn darlledu holl gemau pêl-droed rhyngwladol dynion Cymru tan 2028, fel rhan o gytundeb newydd mewn partneriaeth â Viaplay.
Bydd y ddarpariaeth Gymraeg yn cynnwys dwy ymgyrch nesaf Cynghrair y Cenhedloedd UEFA ar gyfer 2024-25 a 2026-27, gemau rhagbrofol Cwpan y Byd FIFA 2026 a gemau rhagbrofol UEFA Ewro 2028.
Bydd gemau cyfeillgar rhyngwladol Cymru hefyd yn rhan o’r cytundeb hwn, fydd yn gweld o leiaf 40 gêm yn cael eu darlledu’n fyw ar S4C.
‘Hwb aruthrol i’r iaith Gymraeg’
Yn ôl Aaron Ramsey, capten Cymru, bydd y cytundeb hwn yn “hwb aruthrol i’r iaith Gymraeg”.
“Mae’n newyddion gwych fod y gemau am fod ar gael i bawb ar S4C,” meddai.
“Y nod i ni fel carfan yw cyrraedd rowndiau terfynol yr Ewros a Chwpan y Byd, ac rydym yn gobeithio y bydd S4C yn rhannu ein llwyddiant gyda’r gwylwyr.”
Mae’r cytundeb rhwng y gwasanaeth ffrydio Viaplay ac S4C yn bartneriaeth unigryw fydd yn caniatáu i S4C gael yr hawliau iaith Gymraeg yn ecsgliwsif yn y Deyrnas Unedig i ddarlledu’r gemau am ddim.
Rondo, cynhyrchwyr darllediadau ‘Sgorio Rhyngwladol’ o bêl-droed Cymru ar S4C, fydd yn cynnal y darllediad ar gyfer holl gemau rhyngwladol cartref Cymru.
Daw hyn wrth i’r hawliau i ddarlledu pob un o gemau rhagbrofol Cymru ar gyfer Pencampwriaethau Dan 21 UEFA Ewro 2025 yn Slofacia hefyd gael eu sicrhau gan S4C.
‘S4C yw cartref pêl-droed Cymru’
“Rydym wrth ein boddau ein bod ni’n gallu darlledu gemau pêl-droed rhyngwladol Cymru ar S4C tan 2028,” meddai Siân Doyle, Prif Weithredwr S4C.
“Mae hyn yn adeiladu ar y bartneriaeth ragorol sydd gennym eisoes gyda Viaplay, a hoffwn ddiolch iddynt am eu cydweithrediad ar y cytundeb.
“S4C yw cartref pêl-droed Cymru, ac rydym yn falch o sefyll ochr yn ochr â Chymdeithas Pêl-droed Cymru a chefnogwyr brwd y Wal Goch.”
Mae Viaplay hefyd wedi croesawu’r cytundeb.
“Rydym wrth ein boddau i fod yn bartner gydag S4C sydd wedi bod yn gefnogwr anhygoel i bêl-droed Cymru ar hyd y blynyddoedd,” meddai Ed Breeze, Dirprwy Gyfarwyddwr a Phennaeth Chwaraeon y Deyrnas Unedig y cwmni.
“Mae gan bêl-droed Cymru gefnogwyr brwd iawn ac rydym ni’n falch o sicrhau bod y gemau hyn sydd mor arwyddocaol yn genedlaethol ar gael i’r gynulleidfa ehangaf posib.”
Yn ôl Noel Mooney, Prif Weithredwr Cymdeithas Bêl-droed Cymru, mae’r bartneriaeth gydag S4C “wedi bod yn gonglfaen i dwf Y Wal Goch”.
“Rydym yn hapus iawn fod gemau Tîm Cenedlaethol Dynion Cymru am fod ar gael yn rhad ac am ddim i bawb,” meddai.
“Rwyf am ddiolch i Viaplay, sydd wedi bod yn allweddol yn y cydweithio hyn i sicrhau bod ein gemau ar gael i bawb.
“Mae Sian Doyle yn S4C hefyd wedi bod yn ffigwr allweddol wrth drafod y canlyniad positif yma i Gymru.
“Mae hon yn oes aur i Gymru, ac rydym yn falch iawn o allu ei rannu â phawb.”
