Rhag ofn bod angen eich atgoffa, roedd tîm pêl-droed Cymru’n chwarae yng Nghwpan y Byd neithiwr (nos Lun, Tachwedd 22) – a hynny am y tro cyntaf ers 1958.
Yn rhan annatod o awyrgylch gemau Cymru ers tro, fe fu’r band pres poblogaidd y Barry Horns yn chwarae yng ngwesty’r InterContinental yn Doha cyn mynd draw am Stadiwm Ahmad Bin Ali yn Al Rayyan ar gyfer y gêm fawr yn erbyn yr Unol Daleithiau – ddyddiau’n unig ar ôl i’r band fod yn perfformio yn ystod y digwyddiad yn Stadiwm Dinas Caerdydd i ffarwelio â’r garfan cyn iddyn nhw hedfan i Qatar.
Fel rhan o eitem arbennig i golwg360, Tomos Williams o’r Barry Horns a’r band jazz Burum, aeth â ni draw i’r parti…
Mae’r Barry Horns wedi hen arfer â chwarae Yma O Hyd, anthem swyddogol Cymru ar gyfer Cwpan y Byd, ac fe gawson nhw gyfarfod â’r dyn ei hun, Dafydd Iwan allan yn Qatar…
Cyn yr ornest fawr, roedd cyfle i gefnogwyr Cymru a’r Unol Daleithiau gymysgu â’i gilydd… roedd Captain America yn sicr yn barod amdani…
A fyddai’r ddau yma – Tomos Williams a Gareth Evans, sy’n aelodau o’r Barry Horns – yn gwenu ar ddiwedd y gêm, tybed…?
Roedd y cefnogwyr hyn o India yn sicr yn gwenu yng nghanol y Wal Goch…
Parti ar ôl cipio pwynt
Ar ôl i Gymru ennill eu pwynt cyntaf yng Nghwpan y Byd ers 64 o flynyddoedd, roedd hi’n hen bryd i’r parti ddechrau – a phwy gwell na’r Barry Horns i’w arwain…
Cafodd sawl chwaraewr Cymru gêm i’w chofio, gan gynnwys y sgoriwr a’r capten Gareth Bale. Roedd cryn ganmoliaeth hefyd i Neco Williams o dan amgylchiadau personol anodd ar ôl colli ei daid 24 awr cyn y gêm.
Ond does dim amheuaeth pwy yw arwr y criw yma…
