Cyn-reolwr Abertawe yn y ras am swydd rheolwr Manchester United

Mae Brendan Rodgers, cyn-reolwr Abertawe, yn y ras am swydd rheolwr Manchester United.

Daw hyn ar ôl i Ole Gunnar Solskjaer gael ei ddiswyddo heddiw (dydd Sul, Tachwedd 21).

Mae Rodgers wedi gwneud cryn argraff gyda Chaerlŷr (Leicester City), gan ennill Cwpan FA Lloegr y tymor diwethaf a gorffen yn bumed yn Uwch Gynghrair Lloegr ddau dymor yn olynol.

Mae e wedi bod yn rheolwr ar Lerpwl, gan ennill yr Uwch Gynghrair yn 2014, ac ar Celtic yn yr Alban, lle enillodd e saith tlws dros gyfnod o ddwy flynedd a hanner.

Ond yng Nghymru, fe fydd e’n cael ei gofio fel y rheolwr wnaeth arwain Abertawe i Uwch Gynghrair Lloegr yn 2011.

Ole Gunnar Solskjaer

Roedd sôn ers tro bod Solskjaer, cyn-ymosodwr Norwyaidd Manchester United a chyn-reolwr Caerdydd, yn debygol o golli ei swydd.

Daeth y penderfyniad i’w ddiswyddo ar ôl iddyn nhw golli o 4-1 yn erbyn Watford ddoe (dydd Sadwrn, Tachwedd 20).

Cafodd ei benodi fis Rhagfyr 2018 ar ôl derbyn y swydd dros dro i olynu Jose Mourinho.

Bydd Solskjaer yn cael ei gofio yn Old Trafford am ei ran yn llwyddiant y tîm enillodd y trebl yn 1999.

Michael Carrick, cyn-chwaraewr arall, yw’r rheolwr dros dro a bydd y clwb yn chwilio am olynydd i Solskjaer tan ddiwedd y tymor.

Mae’n bosib y gallen nhw roi’r cyfrifoldeb yn nwylo Carrick, sydd wedi bod yn aelod o dîm hyfforddi’r clwb ers ymddeol yn 2018, ar ôl 12 mlynedd gyda’r tîm.

Yr ymgeiswyr posib

Zinedine Zidane (heb glwb)

Y Ffrancwr 49 oed yw’r ffefryn yn ôl y bwcis.

Fe fu’n ddi-waith ers gadael Real Madrid yn gynharach eleni, ac yntau wedi ffraeo sawl gwaith â Gareth Bale yn ystod cyfnod y Cymro gyda mawrion Sbaen.

Cafodd ei benodi yno yn 2016, gan ennill LaLiga a Chynghrair y Pencampwyr dair gwaith.

Gadawodd y clwb yn 2018 ond fe ddychwelodd ddeg mis yn ddiweddarach, gan ennill y gynghrair eto cyn gadael ym mis Mai.

Mauricio Pochettino (PSG)

Mae lle i gredu bod yr Archentwr wedi mynegi diddordeb yn y swydd yn y gorffennol.

Roedd e ar gael am gyfnod ar ôl cael ei ddiswyddo gan Spurs fisoedd ar ôl cyrraedd rownd derfynol Cynghrair y Pencampwyr yn 2019.

Cafodd ei benodi’n rheolwr ar glwb Paris Saint Germain yn Ffrainc ddechrau’r flwyddyn, lle mae’n rheolwr ar rai o’r mawrion gan gynnwys Lionel Messi, Neymar a Kylian Mbappe.