Mae chwaraewr canol cae ymosodol Caerdydd, Lee Tomlin, wedi gadael y clwb.
Daw hyn yn dilyn trafodaethau lle cytunodd y chwaraewr a’r clwb y byddai’n well pe bai’n gadael.
Roedd y gŵr 32 oed yn chwaraewr allweddol i Gaerdydd am gyfnod ac ef oedd hwb creadigol y tîm yn nhymor 2019-20, gan sgorio wyth gôl a chreu 10 arall wrth i’r Adar Gleision gyrraedd gêmau ail-gyfle’r Bencampwriaeth.
Trafodaethau
Ond mae anafiadau’n golygu nad yw wedi chwarae ers mis Hydref 2020.
Dim ond pum ymddangosiad a wnaeth y tymor diwethaf ac nid yw wedi chwarae o gwbl yn yr ymgyrch hon.
Roedd cytundeb Lee Tomlin, a gafodd ei ymestyn y llynedd, i fod i ddod i ben ddiwedd y tymor hwn.
“Gall Clwb Pêl-droed Dinas Caerdydd gadarnhau, yn dilyn trafodaethau hir, fod Lee Tomlin wedi gadael y clwb,” meddai’r clwb mewn datganiad.
“Hoffem ddiolch iddo am ei gyfraniad a dymuno’r gorau iddo ar gyfer y dyfodol.”
