Mae’r chwaraewr canol cae George Byers wedi ymuno â Sheffield Wednesday o Abertawe.
Treuliodd Byers, 25, chwe blynedd gyda’r Elyrch, gan chwarae mewn 65 o gemau a sgorio wyth gôl.
Mae e wedi llofnodi cytundeb dwy flynedd gyda’r Owls, ac mae’r cytundeb hefyd yn cynnwys cymal fydd yn sicrhau swm o arian i Abertawe pe bai’n cael ei werthu eto.
Ymunodd e â’r Elyrch o Watford yn 2015, gan ddod yn aelod o’r tîm dan 23 oedd wedi ennill y gynghrair a’r gwpan yn 2016-17, ac fe enillodd ei le ar y fainc ar gyfer y gêm gwpan yn erbyn Spurs y tymor canlynol.
Daeth ei gêm gyntaf yn nhîm Graham Potter yn 2018-19, ac fe chwaraeodd e mew 26 o gemau y tymor hwnnw a sgorio’i gôl gyntaf yn y fuddugoliaeth o 1-0 dros Millwall.
Chwaraeodd e 39 o weithiau yn nhîm Steve Cooper yn 2019-20 wrth i’r Elyrch gyrraedd y gemau ail gyfle, ond fe gafodd e nifer o anafiadau y tymor diwethaf oedd wedi ei gadw e allan o’r tîm am gyfnodau sylweddol.
Ymunodd e â Portsmouth ar fenthyg yn ail hanner y tymor diwethaf, gan chwarae mewn 15 o gemau, gan gynnwys rownd derfynol Tlws yr EFL yn erbyn Salford yn Wembley.
