Mae Cymdeithas Bêl-droed Cymru wedi cyhoeddi mai’r Gwyddel Noel Mooney yw’r Prif Weithredwr newydd.
Bydd yn cychwyn yn ei swydd newydd ar Awst 30.
Mi fydd yn ymuno o UEFA lle mae e’n Bennaeth Datblygu Strategol ac yn gweithio gyda phob un o’r 55 ffederasiwn ac yn eu cynorthwyo ar bob agwedd o’u datblygiad.
Yn wreiddiol o Cappamore, Limerick yng Ngweriniaeth Iwerddon, mae’n gyn-golwr i glybiau pêl-droed Limerick, Cork a Shamrock Rovers.
Fe ymunodd â Chymdeithas Bêl-droed y Weriniaeth yn 2006 ac roedd yn gyfrifol am farchnata Cynghrair Iwerddon.
Ymunodd â UEFA yn 2011 ac yn 2019 bu’n arwain Cymdeithas Bêl-droed Iwerddon am gyfnod dros dro.
“Pennod newydd”
Dywed Noel Mooney ei fod e am i Gymdeithas Bêl-droed Cymru “ddatblygu i fod yn un o’r goreuon yn y byd”.
“Yn y bennod newydd yma yn hanes pêl droed Cymru, mi fyddwn yn tyfu ac yn esblygu’r gêm gan ddod yn fwy llwyddiannus a phoblogaidd,” meddai.
“Edrychaf ymlaen yn fawr i weithio gyda phawb er mwyn cyrraedd ein gwir botensial.
“Dros y ddeng mlynedd ddiwethaf gyda UEFA, mi rydw i wedi gweithio gyda phobol arbennig iawn er mwyn datblygu’r gêm dros Ewrop.
“O hyn ymlaen, mi fydda i’n canolbwyntio ar Gymru gan sicrhau bod Cymdeithas Bêl-droed Cymru yn datblygu i fod yn un o’r goreuon yn y byd; yn gryf yn lleol, ac ym mhob pentref a thref ar draws y wlad.”
“Llwyddiant a datblygiad”
Mae Kieran O’ Connor, Llywydd Cymdeithas Bêl-droed Cymru, wedi croesawu’r penodiad.
“Mae Cymdeithas Bêl-droed Cymru yn gweld Noel fel y person cywir i arwain y gymdeithas i mewn i gyfnod newydd o lwyddiant a datblygiad,” meddai.
“Mae ganddo brofiad helaeth o weithio gyda chymdeithasau pêl-droed ledled Ewrop yn ystod y degawd diwethaf.
“Fel cymdeithas, rydym wrth ein bodd ei fod yn barod i ganolbwyntio ei egni nawr ar Gymru.”
