Mae Clwb Pêl-droed Caerdydd wedi denu’r cefnwr chwith Ryan Giles ar fenthyg am dymor o Wolves.
Treuliodd y chwaraewr 21 oed gyfnodau ar fenthyg gyda Coventry a Rotherham y tymor diwethaf.
Mae e hefyd wedi chwarae i Telford ac Amwythig yn y gorffennol.
Daeth ei gêm gyntaf i Wolves yng Nghwpan FA Lloegr yn 2019.
Mae’n dweud ei fod e wrth ei fodd o gael ymuno â’r Adar Gleision.
“Mae Caerdydd yn glwb enfawr a chanddo hanes gwych a chefnogwyr anhygoel,” meddai wrth wefan yr Adar Gleision.
“Mae chwaraewyr da iawn yma a dw i’n credu y bydd y gystadleuaeth yn iachus.
“Gobeithio y bydd yn sicrhau fy mod i ar fy ngorau.
“Dw i eisiau dod yma, cael cynifer o gemau ag y galla i a helpu’r tîm gymaint â phosib.”
