Mae’r actores Vicky McClure a’i dyweddi Jonny Owen am noddi Clwb Pêl-droed Merthyr y tymor nesaf.
Mae Vicky McClure yn adnabyddus am ei rôl yn y rhaglen ‘Line of Duty’, tra bod Jonny Owen, sydd yn actor a chyflwynydd radio, yn dod o Ferthyr Tudful.
Bydd enw cwmni cynhyrchu newydd y cwpl, BYO Films, yn ymddangos ar siorts y clwb yn nhymor yn 2021-22.
“Dymunwn bob llwyddiant i’r rheolwr a’r tîm y tymor hwn ac edrychwn ymlaen at ddod i lawr pan allwn i gefnogi’r Martyrs,” meddai’r ddau wrth wefan Clwb Pêl-droed Merthyr.
“Mae’r ddau ohonom yn caru’r dref ac yn gefnogwyr brwd o bêl-droed ar lawr gwlad.”
? Merthyr Town Football Club are delighted to have secured an exciting new partnership deal.
Line of Duty’s Vicky McClure and her fiancée, Filmmaker, Times columnist and TalkSPORT presenter Jonny Owen are new sponsors of Merthyr Town FC…
Jonny Owen x @Vicky_McClure
— The Martyrs (@MerthyrTownFC) June 3, 2021
Wrth siarad wedyn ar BBC Radio Wales, dywedodd Jonny Owen fod y ddau yn awyddus i wneud rhywbeth i helpu’r clwb yn dilyn pandemig y coronafeirws – sydd wedi effeithio clybiau ar lawr gwlad ledled y Deyrnas Unedig.
“Mae hi (Vicky) wedi bod yno gyda fi dipyn o weithiau, chwarae teg iddi,” meddai.
“Roedd hi’n canu ar y karaoke i lawr yno ychydig o Nadoligau yn ôl.
“Roedd hi wrth ei bodd ac eisiau gwneud hyn hefyd.
“Mae mor bwysig i glybiau fel Merthyr eu bod yn cael ychydig o help.”
“Hynod o ddiolchgar”
Ychwanegodd y clwb mewn datganiad: “Mae Vicky yn un o actorion mwyaf poblogaidd y wlad ac mae Jonny yn ffigwr uchel ei barch yn y gêm.
“Mae’n fachgen o Ferthyr nad yw erioed wedi anghofio ei wreiddiau.
“Fe’i magwyd fel cefnogwr gyda chysylltiad teuluol cryf â’r clwb ac mae hefyd wedi ein helpu gyda nifer o noddwyr newydd ar gyfer y tymor nesaf ac rydym yn hynod ddiolchgar iddo am hynny.
“Mae ei ddyweddi Vicky McClure wedi bod i Barc Penydarren ac rydym yn edrych ymlaen at eu croesawu pan fyddant yn dod i’n gweld.”
