Mae Gareth Bale wedi sgorio mewn dwy gêm glwb yn olynol am y tro cyntaf ers iddo sgorio mewn tair o’r bron i Real Madrid yn 2018.
68 eiliad yn unig gymerodd hi i’r Cymro rwydo yng ngêm Spurs yn erbyn Burnley heddiw (dydd Sul, Chwefror 28).
Ac fe wnaeth e greu gôl i Harry Kane gyda phàs hir ar ôl chwarter awr i ddyblu mantais ei dîm.
Ar ôl chwarae rhan yn y drydedd gôl gan Lucas Moura, sgoriodd y Cymro ei ail gôl ddeng munud wedi’r egwyl.
Creodd Son Heung-min le ar yr asgell chwith cyn symud y bêl i Bale, a hwnnw’n torri tu fewn ac yn tanio ergyd i gornel isa’r rhwyd.
Dyma’r trydydd tro iddo ddechrau gêm yn Uwch Gynghrair Lloegr ers ymuno â Spurs, ei hen glwb, ar fenthyg o Real Madrid yn y ffenest drosglwyddo.
Enillodd Spurs y gêm o 4-0.
