Mae’r Cymro Neco Williams wedi llofnodi cytundeb pum mlynedd newydd i aros gyda Chlwb Pêl-droed Lerpwl.
Fe wnaeth y cefnwr de 19 oed lofnodi’r cytundeb gyda phencampwyr Uwch Gynghrair Lloegr wrth i’r garfan ymarfer fynd ar daith baratoadol i Awstria.
Mae’n dweud ei fod yn deimlad “anhygoel”, ac nad oes “unlle gwell i ddysgu a dod yn chwaraewr gwell”.
Roedd tymor 2019-20 yn un addawol iddo, ac yntau wedi ennill medal pencampwyr a gwneud ei ymddangosiad cyntaf i’r Cochion yng Nghwpan Carabao yn erbyn Arsenal.
Chwaraeodd e chwe gwaith yn yr Uwch Gynghrair.
Enillodd e fedal fel rhan o Gwpan y Byd Clybiau FIFA.
