Caerdydd 2–0 Huddersfield
Mae dechrau da Caerdydd i’r tymor yn parhau wedi iddynt guro Huddersfield yn Stadiwm y Ddinas brynhawn Sadwrn.
Maent bellach yn ail yn nhabl y Bencampwriaeth diolch i goliau ail hanner Anthony Pilkington a Joe Mason.
Dechreuodd Caerdydd yn addawol a bu rhaid i gôl-geidwad Huddersfield, Jed Steer, fod yn effro i atal cynnig da Kenwyne Jones wedi dim ond pum munud.
Digon diflas oedd yr hanner cyntaf wedi hynny mewn gwirionedd er fod Jones yn meddwl y dylai fod wedi cael cic o’r smotyn.
Roedd yr ail hanner yn dipyn gwell ond gwastraffodd gyfle da arall i agor y sgorio wrth anelu yn syth at Steer.
Fe ddaeth y gôl agoriadol ugain munud o’r diwedd pan rwydodd Anthony Pilkington yn dilyn gwaith da yr eilydd, Sammy Ameobi.
Cafodd Ameobi gryn argraff ar y gêm ac roedd yn ei chanol hi unwaith eto pan sicrhaodd Mason y fuddugoliaeth yn fuan wedyn, Ameobi yn taro’r bêl heibio i Steer a Mason yn rhwydo.
Mae’r canlyniad yn codi Caerdydd i’r ail safle yn y tabl, bedwar pwynt y tu ôl i Brighton ar y brig.
.
Caerdydd
Tîm: Marshall, Peltier (Malone 19′), Morrison, Connolly, Fabio, Pilkington, Dikgacoi, Whittingham, Ralls, Jones (Ameobi 59′), Mason (Gunnarsson 86′)
Goliau: Pilkington 69’, Mason 77’
Cerdyn Melyn: Fabio 90’
.
Huddersfield
Tîm: Steer, Cranie, Ward, Lynch, Smith, Scannell, Hogg (Huws 64′), Whitehead, Bunn (Carayol 72′), Paterson (Miller 72′), Wells
Cerdyn Melyn: Hogg 16’
.
Torf: 13,715
