Joe Allen
Dwy flynedd yn ôl roedd Ben Davies yn rhan o dîm Abertawe gododd Cwpan Capital One, ond yn anffodus iddo fe chafodd e ddim cyfle i geisio efelychu hynny prynhawn dydd Sul.

Cafodd Davies ei gadw ar y fainc wrth i Spurs ddewis Danny Rose yn safle’r cefnwr chwith – a cholli 2-0 i Chelsea yn y ffeinal yn Wembley.

Un Cymro fu ar y cae am 90 munud dydd Sul fodd bynnag oedd Joe Allen, a berfformiodd yn wych wrth i Lerpwl drechu Man City 2-1 yn yr Uwch Gynghrair.

Rhai o chwaraewyr ymosodol mwy disglair Lerpwl gipiodd y penawdau gyda goliau gwych, ond roedd gallu Allen i gadw’r meddiant a’i waith caib a rhaw amddiffynnol yn allweddol i fuddugoliaeth ei dîm.

Roedd tri o’r Cymry ar y fainc yn West Ham dydd Sadwrn wrth i James Collins, Joe Ledley a Wayne Hennessey wylio Crystal Palace yn croesi Llundain i gipio’r pwyntiau – Ledley oedd yr unig un ddaeth oddi ar y fainc.

Cipiodd Abertawe fuddugoliaeth o 1-0 yn Burnley gydag Ashley Williams a Neil Taylor yn cadw llechen lân, er y gallai Taylor fod wedi ildio cic o’r smotyn ar ôl cael ei freichiau dros Sam Vokes oedd ymlaen fel eilydd i’r tîm cartref.

Dim cystal lwc i Gareth Bale a Real Madrid wrth iddyn nhw gael gêm gyfartal 1-1 gartref yn erbyn Villarreal, a Bale bellach heb sgorio yn ei saith gêm ddiwethaf i Los Blancos.

Y Bencampwriaeth

Yn y Bencampwriaeth, fe adawodd Dave Edwards a Wolves dde Cymru gyda’r pwyntiau i gyd wrth iddyn nhw drechu Caerdydd o 1-0 i godi’n agosach at safleoedd y gemau ail gyfle.

Dechreuodd Morgan Fox i Charlton wrth iddyn nhw drechu Huddersfield 3-0, ond gwylio o’r fainc yn unig oedd Simon Church.

Colli 3-0 oedd hanes Chris Gunter a Hal Robson-Kanu fodd bynnag yn erbyn Nottingham Forest.

Chwaraeodd David Cotterill 90 munud wrth i Birmingham drechu Brentford, ac fe gafodd Adam Henley gêm lawn i Blackburn wrth iddyn nhw gael canlyniad di-sgôr yn Bournemouth.

Yn Uwch Gynghrair yr Alban fe ymestynnodd Celtic ac Adam Matthews eu mantais ar y brig gyda buddugoliaeth dros Aberdeen ac Ash Taylor.

Ac yng Nghynghrair Un fe chwaraeodd Chris Maxwell, George Williams, Gwion Edwards, Elliott Hewitt, Lewin Nyatanga, James Wilson a Tom Bradshaw.

Seren yr wythnos – Joe Allen. Perfformiad gwych i dawelu’r rheiny yn Lerpwl fu’n ei feirniadu’n ddiweddar.

Siom yr wythnos – Ben Davies. Gorfod gwylio’i dîm yn mynd allan o Gynghrair Ewropa ac yna’n colli ffeinal y Capital One wythnos yma.