Y Seintiau Newydd 2–0 Airbus

Aeth y Seintiau Newydd un cam yn nes at bencampwriaeth Uwch Gynghrair Cymru gyda buddugoliaeth lwcus dros Airbus ar Neuadd y Parc brynhawn Sul.

Llwyr reolodd Airbus ran helaeth o’r gêm ond mae goliau Matty Williams ac Adrian Cieslewicz yn golygu mai dim ond un pwynt arall mae’r Seintiau ei angen i sicrhau pencampwriaeth arall.

Hanner Cyntaf

Cafodd y Seintiau y dechrau perffaith gyda rhodd o gôl gan Airbus yn y pedwerydd munud. Ceisiodd Andy Jones basio’r bêl yn ôl i’w gôl-geidwad, James Coates, ond doedd dim digon o nerth arni a llithrodd Matty Williams i mewn i gyrraedd y bêl cyn Coates a’i rhoi yng nghefn y rhwyd.

Bu rhaid i Mike Pearson benio cynnig Cieslewicz oddi ar y llinell i atal y Seintiau rhag dyblu’r fantais a gwastraffodd Jamie Mullan gyfle da pan beniodd yn syth at Coates.

Wedi dweud hynny, Airbus oedd y tîm gorau ar y cyfan ac roedd angen arbediad da gan Paul Harrison i atal cynnig da Jordan Barrow o bellter. Creodd Ryan Wignall gyfle da iddo’i hun gyda rhediad da hefyd cyn anelu ei ergyd yn syth at Harrison.

Ail Hanner

Parhau i reoli a wnaeth yr ymwelwyr o Frychdyn yn yr ail hanner hefyd a bu bron i Glen Rule unioni pethau pan wyrodd cliriad Kai Edwards oddi arno fodfeddi heibio’r postyn.

Cafodd Airbus gyfres o gyfleoedd mewn cyfnod o bum munud toc wedi’r awr ond heb lwyddo i roi’r bêl yn y rhwyd. Cafodd peniad Barrow ei chlirio oddi ar y llinell gan Chris Seargeant cyn i gynnig Chris Budrys wyro yn erbyn y postyn. Daeth cyfle da i Andy Jones hefyd ond peniodd yntau heibio’r postyn.

Tawelodd pethau wedi hynny ond roedd angen arbediad da gan Harrison i atal cic rydd Tom Field chwarter awr o’r diwedd wrth i’r Seintiau ddal eu gafael ar y fantais fain.

Bu rhaid i’r Seintiau aros tan bum munud o’r diwedd am eu cyfle cyntaf o’r ail hanner ond daeth hwnnw i Cieslewicz a pasiodd yntau’r bêl yn daclus i’r gornel isaf i sicrhau’r tri phwynt.

Mae’r Seintiau bellach 17 pwynt yn glir o’r Bala ar frig y tabl gyda chwech gêm ar ôl a bydd pwynt yn eu herbyn mewn pythefnos yn ddigon iddynt. Mae Airbus ar y llaw arall yn aros yn drydydd, dri phwynt y tu ôl i’r Bala.
.
Y Seintiau Newydd
Tîm: Harrison, Spender (Seargeant 46’), Baker, Rawlinson, Marriott, K. Edwards, A. Edwards, Mullan (Quigley 64’), Williams, Cieslewicz
Goliau: Williams 4’, Cieslewicz 85’
Cardiau Melyn: A. Edwards 54’, Harrison 90′
.
Airbus
Tîm: Coates, Owens, Jones, Pearson, McGinn (Evans 80’), Barrow, Field, Rule (Short 72’), Wade, Budrys, Wignall (Riley 72’)
Cerdyn Melyn: McGinn 42’