Abertawe 1–1 Crystal Palace
Bu rhaid i Abertawe fodloni ar gêm gyfartal wrth i Crystal Palace ymweld â’r Liberty brynhawn Sadwrn.
Er i Wilfred Bony roi’r Elyrch ar y blaen fe darodd Palace yn ôl gyda chic o’r smotyn Mile Jedinak.
Dechreuodd Abertawe’r gêm ar dân ac roeddynt yn llawn haeddu mynd ar y blaen pan rwydodd Bony o groesiad Gylfi Sigurdsson wedi chwarter awr, y blaenwr yn troi a rhwydo mewn un symudiad slic.
Roedd Palace yn well wedi i James McArthur ddod i’r cae hanner ffordd trwy’r hanner ac roeddynt yn gyfartal wedi 25 munud yn dilyn cic o’r smotyn ddadleuol. Doedd dim llawer yn y drosedd a ddyfarnwyd yn erbyn Jonjo Shelvey ar Marouane Chamakh ond fe rwydodd Jedinak yn hyderus i unioni’r sgôr o ddeuddeg llath.
Cafodd Abertawe gyfleoedd i’w hennill hi yn yr ail hanner ac er i Sigurdsson a Shelvey ddod yn agos bu rhaid iddynt fodloni ar bwynt yn y diwedd.
Mae Abertawe’n aros yn seithfed yn nhabl yr Uwch Gynghrair.
.
Abertawe
Tîm: Fabianski, Rangel, Bartley, Williams, Taylor, Ki Sung-yueng, Shelvey, Routledge (Barrow 65′), Sigurdsson, Montero, Bony (Gomis 75′)
Gôl: Bony 15’
.
Crystal Palace
Tîm: Speroni, Ward, Dann, Hangeland, Kelly, Puncheon (Zaha – 81′), Jedinak, Ledley, Bolasie, Chamakh (Campbell 66′), Gayle (McArthur 21′)
Gôl: Jedinak [c.o.s.] 25’
Cardiau Melyn: Chamakh 40’, McArthur 69’
.
Torf: 20,240
