Y Cae Ras yn Wrecsam
Fe fydd Wrecsam yn herio un ai Stevenage neu Maidstone yn ail rownd Cwpan FA Lloegr ar ôl i’r enwau gael eu dewis neithiwr.
Bydd y Dreigiau gartref ar y Cae Ras ar benwythnos 6 a 7 Rhagfyr, ar ôl iddyn nhw lwyddo i drechu Woking 3-0 dydd Sul yn y rownd gyntaf.
Cafodd Stevenage a Maidstone gêm gyfartal di-sgôr dros y penwythnos, gan olygu y byddwn nhw’n ailchwarae’r gêm ar nos Fawrth 18 Tachwedd.
Tase Wrecsam yn trechu enillydd y gêm honno yn yr ail rownd, fe allan nhw chwarae un o gewri’r Uwch Gynghrair neu’r Bencampwriaeth yn y drydedd rownd.
Mae Stevenage yn 16eg ar hyn o bryd yng Nghynghrair Dau, un adran yn uwch na Wrecsam, tra bod Maidstone yn ail yng Nghynghrair Ryman sydd dau lefel yn is na Wrecsam.
