Gareth Bale
Mae disgwyl i Gareth Bale gael ei enwi yng ngharfan Real Madrid heno ar gyfer y gêm yn erbyn Lerpwl yng Nghynghrair y Pencampwyr.
Dechreuodd y Cymro ymarfer unwaith eto’r wythnos hon ar ôl methu pythefnos o chwarae oherwydd anaf i gyhyr yn ei ben ôl.
Y tebygolrwydd yw mai dechrau ar y fainc fydd Bale yn y Stadiwm Bernabeu heno, ond dyw ei reolwr Carlo Ancelotti heb ddiystyru’r posibilrwydd y gall chwaraewr drytaf y byd gael ei enwi yn y tîm o’r cychwyn.
“Mae’n barod i chwarae. Dw i ddim yn gwybod a fydd e’n dechrau eto, neu ar y fainc,” meddai Ancelotti yn y gynhadledd cyn y gêm.
Bydd dychweliad Bale yn newyddion da iawn i reolwr Cymru Chris Coleman, fydd yn enwi’i garfan ddydd Iau ar gyfer y trip i Wlad Belg ar 16 Tachwedd.
Mae Cymru’n teithio i Frwsel ar gyfer y gêm honno ar frig eu grŵp rhagbrofol Ewro 2016, ac fe fydd Coleman yn gweddïo fod sêr eraill gan gynnwys Aaron Ramsey, Joe Allen ac Ashley Williams yn holliach ar gyfer y daith.
