Casnewydd yn Codi

Casnewydd 1–0 Southend

Mae Casnewydd yn closio at safleoedd ail gyfle’r Ail Adran yn dilyn buddugoliaeth gartref yn erbyn Southend ar Rodney Parade nos Fawrth.

Sgoriodd Mark Byrne unig gôl y gêm i’w dîm gydag ychydig dros chwarter awr i fynd.

Ychydig iawn o gyfleoedd a gafwyd yn yr hanner cyntaf ac yn yr ail fe wastraffodd Southend gyfle euraidd i fynd ar y blaen pan fethodd Myles Weston o’r smotyn yn dilyn trosedd Kevin Feely yn y cwrt.

Manteisiodd Casnewydd yn llawn pan ddisgynnodd y bêl i lwybr Byrne wedi 74 munud, yntau’n dod o hyd i’r gornel isaf gydag ergyd o ochr y cwrt cosbi.

Roedd honno ynghyd â llechen lân yn y cefn yn ddigon i sicrhau’r tri phwynt i dîm Justin Edinburgh.

Mae’r fuddugoliaeth yn codi Casnewydd i’r wythfed safle yn nhabl yr Ail Adran, un safle ac un pwynt yn unig y tu allan i’r safleoedd ail gyfle
.
Casnewydd
Tîm: Day, Feely, Jones, Tancock (Pigott 54′), Hughes, Sandell, Minshull, Byrne (Loveridge 82′), Porter (Flynn 60′), Zebroski, O’Connor
Gôl: Byrne 74’
Cerdyn Melyn: Porter 9’
.
Southend
Tîm: Bentley, White, Thompson, Prosser, Binnom-Williams, Leonard, Atkinson, Timlin (Payne 82′), Deegan, Weston (Barnard 66′), Corr (Coulthirst 89′)
Cerdyn Melyn: Timlin 57’
.
Torf: 2,558