Jack Collison
Mae Jack Collison wedi ymuno ag Ipswich ar gytundeb byr nes diwedd mis Rhagfyr.

Bu’r Cymro yn ymarfer â thîm Ipswich yn ystod yr wythnosau diwethaf ar ôl cael ei ryddhau gan West Ham dros yr haf.

Bydd y chwaraewr canol cae 25 oed nawr yn cael cyfle i geisio torri mewn i’r tîm cyntaf rhwng nawr a diwedd y flwyddyn, yn y gobaith o ennill cytundeb hirach gyda’r clwb sydd yn y Bencampwriaeth.

Fe adawodd Collison West Ham dros yr haf ar ôl chwarae dros 100 gêm i’r clwb, ond mae wedi dioddef nifer o anafiadau sydd wedi ffrwyno’i gyfleoedd.

Treuliodd gyfnodau ar fenthyg yn Bournemouth a Wigan y tymor diwethaf wrth geisio adennill ei ffitrwydd.

Ac fe fydd yn gobeithio gwneud digon o argraff yn Ipswich i dorri nôl mewn i garfan Cymru – mae wedi ennill 17 o gapiau dros ei wlad ond heb gael ei ddewis yn ddiweddar.