Gareth Bale
Rhwydodd Gareth Bale ddwywaith wrth i Real Madrid sicrhau buddugoliaeth gyfforddus dros Rayo Vallecano – gan gynnwys rhedeg ei ail o 80 llathen.

Roedd Madrid eisoes yn gyfforddus ar y blaen o 3-0, gyda Bale yn sgorio trydedd syml, pan gasglodd yr asgellwr y bêl ar ymyl ei gwrt cosbi ei hun a rhedeg hyd y cae cyn sgorio gôl wych arall.

Mae’r fuddugoliaeth yn cadw Los Blancos o fewn tri phwynt i’r brig yn La Liga, gyda saith gêm yn weddill o’r tymor.

Roedd hi’n benwythnos i’w ddathlu i Ashley Williams a Ben Davies yn yr Uwch Gynghrair hefyd, wrth i Abertawe drechu Norwich 3-0 i dawelu’u hofnau nhw ar waelodion y tabl.

Llwyddodd Crystal Palace i gynyddu’r bwlch rhyngddyn nhw a’r tri gwaelod hefyd gyda buddugoliaeth annisgwyl dros Chelsea, John Terry’n penio i’w rwyd ei hun am unig gôl y gêm o dan bwysau gan Joe Ledley.

Chwaraeodd Craig Bellamy y 96 munud llawn wrth i Gaerdydd golli ac yna achub pwynt hwyr yn erbyn West Brom, tra daeth Paul Dummett a Joe Allen oddi ar y fainc i’w timau nhw.

Yn y Bencampwriaeth fe ddaeth prynhawn Sam Vokes i ben yn gynnar wedi anaf i’w ben-glin ar ôl dim ond wyth munud wrth i Burnley herio Caerlŷr yn yr ornest ar frig y gynghrair.

Collodd ei dîm 2-0 hebddo, a chyda Vokes yn edrych mewn poen mawr wrth ddod oddi ar y cae mae’n bosib y bydd yn methu gweddill tymor Burnley.

Roedd yn un o’r Cymry oedd eisoes wedi llwyddo i sgorio ganol wythnos i’w dîm, gyda Steve Morison, Dave Edwards a Jonny Williams hefyd yn rhwydo – a Joniesta yn herio Bale am gôl yr wythnos:

Cyfartal oedd hanes Williams a Morison dros y penwythnos, Ipswich yn parhau ar gyrion y gemau ail gyfle tra bod Millwall yn aros yn y tri gwaelod er i Morison ennill cic o’r smotyn i’w dîm.

Sgoriodd Dave Cotterill gôl gyntaf Doncaster wrth iddyn nhw guro Leeds 2-1 i godi’n bellach o safleoedd y cwymp.

Ac fe chwaraeodd Lewin Nyatanga, Rhoys Wiggins, Hal Robson-Kanu a Chris Gunter i’w timau yn y Bencampwriaeth hefyd, yn ogystal ag Owain Fôn Williams, Ash Taylor, Jake Cassidy, Sam Ricketts ac Edwards yng Nghynghrair Un.

Seren yr wythnos: Gareth Bale – clod i Joniesta am ei gôl wych, ond Bale bia hi eto.

Siom yr wythnos: Sam Vokes – anaf cas yr olwg yn bygwth sbwylio diwedd ei dymor gwych.