Gareth Bale
Ni lwyddodd Gareth Bale i achub canlyniad yn ail El Clasico’r tymor wrth i Real Madrid golli 4-3 i Barcelona yn La Liga neithiwr.

Er i’r Cymro chwarae ychydig yn well nag yn ei gêm gyntaf yn erbyn Barca yn gynharach yn y tymor, roedd yn gymharol dawel unwaith eto wrth i Ronaldo a Messi serennu unwaith yn rhagor.

Os cafodd y cefnogwyr wledd o goliau yn Stadiwm Dinas Caerdydd hefyd doedd hi ddim yn gystal prynhawn i Declan John a Craig Bellamy, y ddau yn cael eu heilyddio wrth i Lerpwl chwalu’r Adar Gleision 6-3 yn yr Uwch Gynghrair.

Chwaraeodd Joe Allen gêm lawn i’r Cochion – er i gefnogwyr Caerdydd gael y floedd olaf wrth i gyn-chwaraewr Abertawe dderbyn cerdyn melyn yn y munud olaf.

Ac er i Ashley Williams sgorio gôl hwyr i Abertawe colli i wrthwynebwyr eraill o Lannau Merswy oedd ei hanes ef a Ben Davies, wrth i Everton ennill 3-2.

Colli oedd hanes James Collins hefyd, wrth i Man United drechu West Ham 2-0 diolch i goliau Wayne Rooney.

Ond fe fu gôl hwyr gan Papiss Cisse yn ddigon i sicrhau buddugoliaeth Newcastle dros Crystal Palace, a’i gwneud hi’n Paul Dummett 1-0 Joe Ledley yn y broses.

Yn y Bencampwriaeth fe rwydodd Sam Vokes unwaith eto, gan sgorio cic o’r smotyn ar gyfer ail gôl Burnley ar ôl trosedd yn erbyn. 3-0 oedd y sgôr terfynol yn eu buddugoliaeth dros Charlton, gyda Rhoys Wiggins a Simon Church ymysg y gwrthwynebwyr.

Llwyddodd Reading i gipio buddugoliaeth hwyr o 2-1 dros Birmingham, gyda Chris Gunter yn croesi ar gyfer gôl fuddugol Jobi McAnuff. Dechreuodd Hal Robson-Kanu i’r tîm buddugol hefyd, ond doedd hi ddim yn brynhawn cystal i Emyr Huws gyda’r gwrthwynebwyr, gyda’r Cymro yn gadael y cae gydag anaf yn yr hanner cyntaf.

Dros y penwythnos fe chwaraeodd Lewin Nyatanga, Adam Henley, Andy King, Jonathan Williams, Jack Collison, ac Adam Matthews yn yr Alban, dros eu clybiau hefyd.

Ond roedd y Cymry’n brysur yn sgorio yng Nghynghrair Un, Dave Edwards yn rhwydo ym muddugoliaeth Wolves ac Ash Taylor a Jason Koumas yn rhwydo dros Tranmere yn eu colled i Port Vale.

Seren yr wythnos: Sam Vokes – Gôl arall mewn tymor gwych i’r Cymro.

Siom yr wythnos: Declan John – Caerdydd eisoes wedi ildio pedair erbyn i’r cefnwr ifanc adael y maes.