Jonathan de Guzman
Everton 3-1 Abertawe
Mae Abertawe allan o Gwpan FA Lloegr ar ôl colli 3-1 yn erbyn Everton yn rownd yr 16 olaf.
Dewisodd Garry Monk nifer o chwaraewyr ymylol carfan Abertawe ar gyfer y trip i Goodison Park, gyda’r Elyrch yn wynebu Napoli nes ymlaen yn yr wythnos.
Sgoriodd Lacina Traore gôl gynnar i Everton cyn i Jonathan de Guzman unioni’r sgôr ar ôl chwarter awr.
Ond fe arweiniodd camgymeriadau amddiffynnol at ddwy gôl arall i Everton yn yr ail hanner, gan olygu mai nhw yn hytrach nag Abertawe fydd yn wynebu Arsenal yn y rownd nesaf.
Ar ôl i Alvaro Vasquez fethu cyfle euraidd i Abertawe yn y munudau cyntaf cafodd yr Elyrch eu cosbi am beidio â chlirio cic rydd, Traore’n fflicio’r bêl i’r rhwyd ar ôl pedair munud.
Ond o fewn deg munud roedd y sgôr yn gyfartal, Jonathan de Guzman yn sleifio i mewn i’r cwrt cosbi i benio croesiad Neil Taylor heibio i Joel Robles.
Roedd y ddau dîm yn flêr gyda meddiant ar adegau, gyda Traore, Steven Pienaar a Kevin Mirallas yn methu cyfleoedd i Everton cyn yr egwyl a Kyle Bartley’n gorfod gadael y maes gydag anaf.
A thoc wedi’r awr fe wnaeth Neil Taylor gamgymeriad erchyll wrth anelu pas wan yn ôl at y golwr Gerhard Tremmel, gydag eilydd Everton Steven Naismith yn cipio’r bêl cyn rhwydo ail gôl ei dîm.
A gydag ugain munud i fynd fe sicrhawyd y canlyniad, Leighton Baines yn rhwydo o’r smotyn ar ôl i Jazz Richards faglu Naismith.
.
Everton
Tîm: Robles, Coleman, Distin, Jagielka, Baines, Barry, McCarthy, Pienaar, Barkley (Osman 61’), Mirallas (Deulofeu 87’), Traore (Naismith 61’)
Goliau: Traore 4’, Naismith 64’, Baines 71’
Abertawe
Tîm: Tremmel, Richards, Taylor, Canas, Bartley (Williams 31’), Amat, de Guzman, Hernandez, Routledge (Dyer 45’), Lamah (Lita 69’), Vasquez
Gôl: de Guzman 15’
Cardiau Melyn: Amat, Lita
