Accrington Stanley 3–3 Casnewydd
Cipiodd Lee Minshull bwynt i Gasnewydd gyda gôl hwyr mewn gêm gyffrous yn erbyn Accrington Stanley yn yr Ail Adran brynhawn Sadwrn.
Newidiodd yr oruchafiaeth sawl gwaith wrth i’r ddau dîm rannu chwe gôl ar y Crown Ground, ond roedd hi’n rhy hwyr i ddim byd newid wedi i Minshull ei gwnued hi’n dair yr un yn yr amser a ganiateir am anafiadau ar ddiwedd y gêm.
Rhoddodd cic rydd Robbie Willmott Gasnewydd ar y blaen wedi dim ond deg munud ond roedd Accrington yn gyfartal hanner ffordd trwy’r hanner diolch i gôl Peter Murphy.
Y tîm cartref oedd ar y blaen ar hanner amser diolch i beniad Kai Naismith o groesiad Murphy funud cyn yr egwyl.
Unionodd Ryan Burge y sgôr ugain munud o’r diwedd gydag ergyd daclus yn dilyn gwaith creu Connor Washington, ond roedd Accrington yn ôl ar y blaen ddau funud o ddiwedd y naw deg pan beniodd Murphy ei ail ef a thrydedd ei dîm i gefn y rhwyd.
Wnaeth yr ymwelwyr o dde Cymru ddim rhoi’r ffidl yn y to serch hynny ac fe achubwyd pwynt pan rwydodd Minshull groesiad Willmott yn yr eiliadau olaf.
Mae Casnewydd yn llithro allan o’r safleoedd ail gyfle o ganlyniad i’r gêm gyfartal. Maent bellach yn wythfed yn nhabl yr Ail Adran.
.
Accrington Stanley
Tîm: Bettinelli, Hunt, Naylor (Wilson 81′), Murphy, Aldred, Winnard, Naismith, Joyce, Odejayi, Webber (Hatfield 81′), Mingoia
Goliau: Murphy 23’, 88’ Naismith 44’
.
Casnewydd
Tîm: Pidgeley, Pipe, Jackson, Sandell, Yakubu, Naylor, Minshull, Burge, Howe, Washington (Jolley 79′), Willmott
Goliau: Willmott 11’, Burge 71’, Minshull 90’
Cardiau Melyn: Howe 28’, Pipe 90’
.
Torf: 1,318
