Aberystwyth 3–2 Caerfyrddin
Aberystwyth aeth â hi mewn gêm lawn goliau yn erbyn Caerfyrddin o flaen camerâu Sgorio ar Goedlan y Parc brynhawn Sadwrn.
Rhoddodd gôl Chris Venables fantais i’r tîm cartref ar hanner amser cyn i ddwy gan Mark Jones wedi’r egwyl sicrhau’r fuddugoliaeth er gwaethaf goliau Jordan Follows a Liam Williams i’r ymwelwyr.
Daeth dau gyfle gorau’r ugain munud cyntaf i Mark Jones ac Aberystwyth. Anelodd y blaenwr beniad rhydd dros y trawst i ddechrau cyn i Kris Thomas wneud yn dda ia atal ei ail gynnig.
Ychydig o gyfleoedd a gafwyd wedi hynny mewn hanner cyntaf digon agos ond roedd Aber yn haeddu bod ar y blaen ar yr egwyl diolch i gôl dda. Cafodd Venables ei ryddhau gan bas dreiddgar Antonio Corbisiero a churodd Steve Cann i agor y sgorio.
Cafodd Venables gyfle gwych i ddyblu’r fantais yn gynnar yn yr ail gyfnod yn dilyn gwaith da Krzystzof Nalborski ar y dde ond cafodd ei atal gan dacl dda Luke Cummings.
Doedd dim rhaid i Aberystwyth aros yn hir am yr ail gôl serch hynny wrth i Mark Jones ddyblu’r fantais bedwar munud cyn yr awr. Manteisiodd yr ymosodwr ar ansicrwydd Cortez Belle yng nghanol yr amddiffyn i dderbyn pas hir obeithiol Wyn Thomas cyn curo Cann yn y gôl.
Gwastraffodd Cledan Davies gyfle da i selio’r fuddugoliaeth yn fuan wedyn, ac roedd Caerfyrddin yn ôl ynddi chwarter awr o’r diwedd pan sgoriodd Follows yn dilyn smonach yng nghwrt cosbi Aberystwyth.
Adferodd y tîm cartref eu dwy gôl o fantais wedi hynny pan sgoriodd Jones ei ail ef a thrydedd ei dîm saith munud o ddiwedd y naw deg. Roedd Belle yn wael yn yr amddiffyn eto, yn caniatáu Venables i ennill y bêl cyn rhyddhau Jones i sgorio.
Sgoriodd Liam Thomas o’r smotyn yn yr amser a ganiateir am anafiadau yn dilyn trosedd Corbisiero ar Corey Jenkins ond rhy ychydig rhy hwyr oedd hynny wrth i Aberystwyth ddal eu gafael ar y fuddugoliaeth.
Mae Aber yn aros yn seithfed er gwaethaf y fuddugoliaeth ond dim ond gwahaniaeth goliau sydd yn eu gwahanu hwy a’r chwech uchaf bellach. Mae Caerfyrddin ar y llaw arall yn aros yn bumed, bwynt o flaen Aberystwyth gyda dwy gêm i fynd tan y toriad.
.
Aberystwyth
Tîm: Lewis, Corbisiero, Hoy, S. Jones, Venables, M. Jones, Davies, Nalborski (Fraser 89’), Williams (Davies 90’), Shaw (Morgan 78’), Thomas
Goliau Chris Venables 39’, Mark Jones 56’, 83’
Cerdyn Melyn: S. Jones 25’
.
Caerfyrddin
Tîm: Cann, Cummings, Belle, K. Thomas, C. Thomas, Bassett, Collins (L. Thomas 58’), Fowler, McCreesh, Doidge, Follows (Jenkins 85’)
Goliau: Follows 77’, L. Thomas [c.o.s.] 90’
Cerdyn Melyn: Belle 66’
.
Torf: 317
