Fydd Giggs yn cyrraedd carreg filltir arall heno?
Bydd Ryan Giggs yn torri’r record am y chwaraewr sydd wedi chwarae’r nifer fwyaf o gemau yng Nghynghrair y Pencampwyr heno os yw’n dod i’r maes.
Mae Man United wedi teithio draw i’r Wcráin i herio Shakhtar Donetsk, ac os caiff Giggs chwarae dyma fydd gêm rhif 145 iddo yn y gystadleuaeth.
Ar hyn o bryd, mae’n gyfartal ag eicon Real Madrid, Raul, sydd hefyd ar 144 gêm. Y chwaraewr agosaf iddo sy’n dal i chwarae yn y gystadleuaeth yw Xavi o Barcelona, ar 136.
“Ddim hyd yn oed wedi sylwi!”
Pan ddywedwyd wrtho ei fod ar drothwy’r record, dywedodd Giggs wrth wefan y clwb nad oedd yn ymwybodol o’r gamp.
“Wir? Waw, ‘do ni ddim yn gwybod hynny,” meddai. “Mae’n gystadleuaeth grêt a dwi ‘di bod yn ddigon ffodus i’w hennill hi ddwywaith a chwarae mewn digon o gemau cofiadwy.”
“Mae Raul fyny yno efo’r goreuon. Os dwi’n ei basio fo fe fyddai’n teimlo balchder mawr.”
Mae Giggs, sy’n troi’n 40 fis nesaf, eisoes wedi chwarae dros 900 o gemau i’w glwb.
10 uchaf ymddangosiadau Cynghrair y Pencampwyr
| Ryan Giggs | 144 |
| Raul | 144 |
| Paolo Maldini | 140 |
| Xavi | 136 |
| Clarence Seedorf | 131 |
| Paul Scholes | 130 |
| Iker Casillas | 130 |
| Roberto Carlos | 128 |
| Carles Puyol | 118 |
| Andriy Shevchenko | 116 |
Aaron Ramsey yw’r Cymro nesaf ar y rhestr gyda 30 o ymddangosiadau hyd yn hyn.
