Abertawe 1–2 Arsenal
Sgoriodd Aaron Ramsey i Arsenal wrth i’r tîm ar y brig guro Abertawe yn Stadiwm Liberty nos Sadwrn.
Creodd Ramsey y gyntaf i Serge Gnabry cyn ychwanegu’r ail ei hun wrth i’r ymwelwyr fynd ddwy gôl ar y blaen toc wedi’r awr. Ac er i Ben Davies dynnu un yn ôl i’r Elyrch, doedd hi ddim yn ddigon i achub dim o’r gêm.
Yn dilyn hanner cyntaf di sgôr fe aeth Arsenal ar y blaen toc cyn yr awr pan gurodd Gnabry Michel Vorm yn isel wrth ei bostyn agosaf yn dilyn pas Ramsey i’w lwybr ar ochr dde’r cwrt cosbi.
Ychwanegodd Ramsey yr ail ei hun bedwar munud yn ddiweddarach. Taniodd y Cymro ergyd gadarn i’r gornel uchaf yn dilyn gwaith creu taclus Jack Wilshere ac Olivier Giroud.
Rhoddwyd llygedyn o obaith i’r Elyrch serch hynny pan sgoriodd Cymro arall, Ben Davies, i Abertawe ddeg munud o’r diwedd. Roedd hon yn gôl dda hefyd wrth i’r cefnwr chwith wneud rhediad ymosodol tua’r cwrt cosbi, chwarae ‘un dau’ gyda Wilfred Bony cyn curo Wojciech Szczesny.
Roedd digon o amser ar ôl i Abertawe gipio un arall ond daliodd Arsenal eu gafael ar y tri phwynt – tri phwynt sydd yn ddigon i’w cadw ar frig y tabl. Mae Abertawe ar y llaw arall yn llithro o dan Gaerdydd i’r trydydd safle ar ddeg.
.
Abertawe
Tîm: Vorm, Amat, Chico, Tiendalli, Davies, Shelvey (Bony 61′), Dyer, Routledge (Pozuelo 64′), De Guzman, Canas, Michu
Gôl: Davies 82’
Cardiau Melyn: De Guzman 80’, Chico 84’, Canas 84’
.
Arsenal
Tîm: Szczesny, Sagna, Mertesacker, Koscielny, Gibbs, Wilshere (Jenkinson 90′), Ozil (Monreal 88′), Ramsey, Flamini, Gnabry (Arteta 78′), Giroud
Goliau: Gnabry 58’, Ramsey 62’
Cardiau Melyn: Flamini 60’, Arteta 90’
.
Torf: 20,712
