Caerdydd 2–1 Bristol City
Sgoriodd Fraizer Campbell ddwywaith wrth i Gaerdydd drechu Bristol City yn Stadiwm y Ddinas brynhawn Sadwrn i aros un pwynt ar ddeg yn glir ar frig y Bencampwriaeth.
Rhwydodd yr ymosodwr yn eiliadau olaf yr hanner cyntaf ac yna toc cyn yr awr i roi mantais iach i’r tîm cartref, ac roedd hynny’n ddigon i sicrhau’r tri phwynt er gwaethaf gôl hwyr Ben Nudgent i’w rwyd ei hun.
Doedd dim dwywaith mai Caerdydd oedd tîm gorau’r hanner cyntaf ond roedd cyn gôl-geidwad yr Adar Gleision, Tom Heaton, ar dân rhwng y pyst i’r ymwelwyr.
Llwyddodd i arbed cynigion Craig Noone, Craig Bellamy a Campbell yn y deugain munud agoriadol. Ond doedd dim y gall y golwr ei wneud i atal Campbell rhag taranu ergyd i gefn y rhwyd yn eiliadau olaf yr hanner yn dilyn cyd chwarae da rhyngddo ef a Tommy Smith.
Daeth Liam Kelly yn agos i Bristol City gyda chynnig haerllug o bellter yn gynnar yn yr ail gyfnod ond Caerdydd a Campbell a gafodd y gôl nesaf toc cyn yr awr. Daeth Aron Gunnarsson o hyd i’r ymosodwr yn y cwrt cosbi gyda thafliad da a llwyddodd yntau i’w rheoli cyn curo Heaton i sicrhau’r tri phwynt.
Cafwyd ambell eiliad anghyfforddus tuag at y diwedd wedi i Ben Nudgent droi’r bêl i’w rwyd ei hun ond roedd Caerdydd wedi gwneud digon i’w hennill hi erbyn hynny.
Mae’r fuddugoliaeth yn adfer un pwynt ar ddeg o fantais Caerdydd ar frig y Bencampwriaeth tan i Hull chwarae’n hwyrach pryn bynnag.
.
Caerdydd
Tîm: Marshall, Taylor, Hudson, Connolly, Nugent, Whittingham, Noone (Kim Bo-Kyung 84’), Gunnarsson, Smith (Cowie 64’), Campbell (Helguson 72’), Bellamy
Goliau: Campbell 45’, 58’
.
Bristol City
Tîm: Heaton, Foster, Fontaine, Nyatanga, Moloney, Kelly (Kilkenny 80), Pearson (Howard 80’), Anderson (Adomah 64’), Elliott, Stead, Davies
Gôl: Nudgent [g.e.h.] 90’
Cerdyn Melyn: Fontaine 48’
.
Torf: 25,586
