Roedd siom i’r Cymro Gerwyn Price ar noson agoriadol Uwch Gynghrair Dartiau’r PDC yng Nghaerdydd, wrth iddo fe golli o 6-2 yn erbyn y Sais Michael Smith yn y rownd derfynol.
Fe wnaeth Smith guro’r Iseldirwr Michael van Gerwen a’r Sais ifanc Luke Littler ar ei ffordd i’r ffeinal, ond cael a chael oedd hi yn y ddwy gêm honno, gyda buddugoliaethau o 6-5 yn y ddwy.
Er i Price fynd ar y blaen o 1-0 yn y rownd derfynol, tarodd Smith yn ôl i’w gwneud hi’n 3-1, cyn taflu 120 a 107 i fynd o fewn un gêm i’r fuddugoliaeth.
Bu’n rhaid i Smith aros wrth i Price leihau ei fantais rywfaint, ond taflodd y Sais ei bumed 180 cyn gorffen y gêm dyngedfennol ag 13 dart.
Mae’r canlyniad yn golygu bod gan Gerwyn Price driphwynt ar ôl y noson gyntaf, gyda buddugoliaethau dros Nathan Aspinall (6-4) a Rob Cross (6-2) yn y rowndiau blaenorol.
Bydd ail noson y gynghrair yn cael ei chynnal yn Berlin nos Iau nesaf (Chwefror 8).
‘Does dim teimlad gwell’
Yn y cyfamser, mae Jonny Clayton wedi mynegi ei siom na chafodd e chwarae yn yr Uwch Gynghrair eleni.
“Does dim teimlad gwell na chwarae gerbron torf gartref,” meddai’r Cymro Cymraeg o Bontyberem.
“Mae colli allan ar le yn yr Uwch Gynghrair ond yn gwneud i fi fod eisiau gweithio’n galetach i ddychwelyd yno.
“Pob lwc i bob un o’r wyth chwaraewr eleni.”
Canlyniadau’r noson
Rownd yr wyth olaf:
Rob Cross 6-3 Peter Wright
Gerwyn Price 6-4 Nathan Aspinall
Michael Smith 6-5 Michael van Gerwen
Luke Littler 6-2 Luke Humphries
Y rownd gyn-derfynol
Gerwyn Price 6-2 Rob Cross
Michael Smith 6-5 Luke Littler
Y rownd derfynol
Michael Smith 6-2 Gerwyn Price
