Mae tîm criced Morgannwg wedi curo Surrey o saith wiced ar yr Oval yng Nghwpan Undydd Metro Bank.
Dim ond 34 pelawd barodd batiad Surrey, wrth i Jamie McIlroy, Dan Douthwaite, Ben Kellaway ac Andy Gorvin gipio dwy wiced yr un.
Prif sgoriwr Surrey oedd Ben Foakes, wicedwr Lloegr, gyda’i 44 yn achub batiad ei dîm i raddau, a tharodd Conor McKerr 25.
Ond prif bwnc trafod y batiad hwnnw oedd gallu’r troellwr ifanc Ben Kellaway i fowlio â’i ddwy law, wrth iddo fe gipio wiced â’r naill law a’r llall.
Cwrso’n rhwydd
Collodd Morgannwg eu tair wiced o fewn 13.5 pelawd, ond roedden nhw eisoes ar 99 erbyn hynny, ac fe gyrhaeddon nhw’r nod oddi ar 15.5 pelawd.
Sgoriodd Colin Ingram 39 heb fod allan, ar ôl i Eddie Byrom sgorio 28 ar frig y rhestr fatio.
Mae Morgannwg bellach wedi ennill dwy gêm allan o ddwy, a byddan nhw’n herio Swydd Nottingham a Sussex ar gae’r Gnoll yng Nghastell-nedd yr wythnos hon gan obeithio parhau â’u rhediad di-guro yn y gystadleuaeth.
Yn y cyfamser, colli oedd hanes dau dîm y Tân Cymreig yn erbyn yr Oval Invincibles yn y Can Pelen.
Collodd y dynion o ddeg rhediad, a’r menywod o chwe wiced.
